Inspektor nobo di Salubridat Gèrsji Rodrigues Pereira – potrèt: Tico Vos
WILLEMSTAD – Despues di a warda un aña i mei Kòrsou a haña un inspektor nobo di Salubridat: Gersji Rodrigues Pereira. E médiko hulandes ta konsiente di e herensia ku e mester atendé kuné. Inspekshon di Salubridat ta hañando hopi krítika, pa motibu di falta di personal trato di keho ta tarda, i Sehos ta yen di kontroversia. Ta manera espesialmente e siruhanonan por hasi i deshasí manera nan haña bon.
Rodrigues Pereira ta bisa ku e tin eksperiensha ku instanshanan ku ta haña hopi krítika. Anteriormente e tabata presidente di direktva di e hòspitalnan di IJsselmeer, kaminda el a baha na 2008 pa motibu di un maneho ku tabata faya den e klínikanan di Lelystad i Emmeloord. “Mi sa ta kiko ke men para na kabes di un hòspital problemátiko ku problemanan finansiero i mal mantenshon di e salanan di operashon.”
Rodrigues Pereira mes ta bisa ku e tempu ei e no a logra pa pone e hòspitalnan bèk riba pia i di akuerdo ku e Konseho di Supervishon a baha. El a kompartí e pasado aki ku Minister Ben Whiteman di Salubridat, kende djaluna a firma un dekreto pa su nombramentu. “Ami ta masha sinsero tokante di esaki”, Rodrigues Pereira ta bisa.
St. Maarten Medical Center
Sin embargo e sinseridat aki a yega di lag’é na kaya anteriormente; su nombramentu na 2013 komo direktor di St. Maarten Medical Center a kai na awa despues di protesta di miembronan di personal i sindikatonan.
Tòg e ke sigui e trayekto di transparensha i mantené komunikashon abierto ku prensa, algu ku a nèk su predesesor Jan Huurman. Mi ta haña importante pa keda tene siudadanonan na altura di e kalidat di kuido ku ta duna. Parti di esaki ta ku ta tuma keho serio i ku ta trata nan den un término rasonabel, pa despues informá siudadanonan.”
Rodrigues Perereira tin algun luna kaba ta bishitá Kòrsou pa hasi diferente proyekto pa ministerio di Salubridat. “Sinseridat ta importante; Kòrsou ta un komunidat chikitu. Tur hende konosé otro. Ora trata un keho ku hende a entregá esaki ta stimulá otro hende pa entregá keho. Gobièrnu tin e obligashon pa perkurá pa bon kuido di salú i nos mester mustra komunidat esaki.” E inspektor nobo ta añadí si ku no ta e intenshon pa ‘horka’ hende.
Djaluna Rodrigues Pereira ta kuminsá su tarea nobo. E ta konsiente di tur relato den prensa tokante keho ku no a trata i e mal estado di Sehos. Otro siman e sa unda e ta bai kuminsá. “Promé mester deliberá ku inspektor general naturalmente. Ku mi proyektonan anterior na ministerio mi a bishitá hòspital diferente be. Mi a mira kon ta pará na hòspital i e problemanan ku tin ku konstrukshon nobo”, e ta bisa.
Pobersitu
“Wea di pa falta di stul e ta sinta riba tres pieda. Esaki tabata e kaso na Hulanda tambe: e hòspitalnan di IJsselmeer tabata e pobersitunan bou di hòspitalnan i pa añanan largu tabata haña atenshon di prensa. Mi sa mihó ku hopi hende kon difísil ta pa trata ku esaki. E mas importante ku mi ta trese di mi eksperiensha di trabou di ántes ta ku mi sa bon riba kua puntonan mi mester paga tinu.”
Outor Leoni Leidel-Schenk