Foto: Ariën Rasmijn
ORANJESTAD — Tensionnan entre presonan y cuidadornan na KIA ta escalando atrobe, segun René Bernabela, lider di sindicato Topa cu ta representa gran parti di e wardadornan di preso eynan. Segun e sindicalista e wardadornan ta den un incertidumbre riba ken ta bay ta sucesor definitivo di Fred Wijenberg como director di e prison.
“Tin problema tur dia den KIA. Cada rato presonan ta retando e cuidadornan. Fuera di esey e infrastructura den e prison ta total-loss y awor numa gobierno ta den e procedura pa selecta ken ta bay bira e director nobo. Na dado momento e trahadornan ta cuminsa fada”, asina Bernabela ta duna di conoce.
E sindicalista ta bisa cu tin dia cu director suplente Dick van Leenen no ta ni yega na pia di trabou, locual ta causa e impresion serca e cuidadornan cu no tin un hefe na momento aki den e instituto coreccional.
Bernabela ta bisa tambe cu no tin indicacion ainda for di parti di gobierno pa loke ta remodelacion di e areanan den e prison cu practicamente ta inusabel. Awasero di ultimo dianan te hasta lo a causa extra daño, yenando almacennan di e prison cu away y lagando murayanan yena cu schimmel, segun Bernabela. Segun e serca ambos e presonan y e cuidadornan tin frustracionnan grandi ta lantando y cu na dado momento lo por yega na un situacion explosivo un biaha mas, manera tabata e caso dos biaha caba e aña aki.
Candela
Ambos Bernabela y Van Leenen ta confirma cu den ultimo dianan tabatin incidente cu presonan na unda celnan a wordo cendi na candela. Segun Bernabela esaki tin di haber cu e ambiente actual di incertidumbre den KIA, na unda presonan supuestamente kier tuma bentaha di ausencia di un director fiho y kier reta e wardadornan. Van Leenen di su banda ta bisa cu ta trata di incidentenan den e jeugdafdeling na unda antayera e bijstandsteam y K-9 unit a tene un razzia extenso den e celnan pa pone ordo bek.
‘Maneho a keda igual’
Van Leenen di su banda ta lamenta ponencianan di Bernabela y cu e ta trece esakinan den prensa. E ta desmenti cu KIA ta sin capitan na timon aworaki. “E maneho cu nos tabatin bou Wijenberg a keda manteni. KIA sigur no ta mas insigur cu seis luna pasa. Bijstandsteam y brigada di cacho a keda mesun fuerte “, segun e unico cu a resta di e management team. “Esey mi kier cambia lo mas lihe posibel. Aworaki nos ta trahando duro pa haya un director nobo pa KIA.”
Riba e acusacion di Bernabela cu e lo ta ausente, Van Leenen ta bisa cu pa tres dia durante e siman aki, su persona tabata combersando cu candidatonan pa e puesto di director. “Y esey a tuma lugar na oficina di minister di Husticia. Dus berdad, e ora ey mi no ta na KIA, pero mi ta buscando un director. Ami ta un di e poconan eyden cu ta traha seis pa shete dia pa siman. Pues si acaso señor Bernabela no ta wak mi na pia di trabou, no kiermen cu mi no ta trahando”, asina Van Leenen ta declara.
Autor Ariën Rasmijn