Drs. Igma van Putte- de Windt i Dr. Florimon van Putte – potrèt: José Manuel Dias
WILLEMSTAD – “E buki aki ta e promé buki ámplio di gramátika di Papiamentu pero skirbí na Hulandes. Ta eksistí mas buki pero ningun no ta ámplio manera esaki”. Asina drs. Igma van Putte- de Windt ta deskribí e buki ku e i su kasá, dr. Florimon van Putte, a skirbi tokante gramátika di papiamentu. E título di e buki ta ‘Grammatica van het Papiaments, vormen en communicatieve strategieën’.
Djaweps último tabatin presentashon ofisial di e buki aki na University of Curaçao (UoC) kaminda e outornan a entregá un ehemplar na direktor di Fundashon pa Planifikashon di Idioma (FPI), dr. Ronald Severing. Ku e buki aki e pareha van Putte ta spera di por yuda hopi hende manera por ehèmpel dosentenan di Papiamentu ku ta konfrontá problema pa splika alumnonan gramátika di Papiamentu.
Un reportahe di José Manuel Dias
Ku yudansa finansiero di Prins Bernhard Cultuurfonds Caribisch Gebied, Maduro & Curiel’s Bank (MCB) i Banko Sentral di Kòrsou i St. Maarten e outornan a logra imprimí un total di mil ehemplar. ‘Grammatica in het Papiaments’ no ta pa skol básiko i ta destiná solamente pa skol avansá i universidat. E buki mes ta konsistí di 317 página i a dura shete aña pa skirbi e buki aki. Asina e pareha van Putte a duna di konosé.
Igma i Florimon
Igma van Putte- de Windt ta dosente di spañó i tambe di papiamentu. Pa hopi aña el a traha na Hulanda komo dosente di spañó i tambe komo traduktor i intérprete. Te ku e dia di awe e ta miembro di e komishon di eksamen pa tradukshon di Hulandes-Papiamentu i Papiamentu-Hulandes.
Florimon van Putte a studia Spañó, Portugues, Hulandes i Papiamentu.
El a promové den idioma moderno i a traha hopi aña komo dosente na Rijksuniversiteit Leiden. Florimon tin trinta aña ta skirbi riba papiamentu i maneho di idioma kolonial riba e islanan di Aruba, Boneiru i Kòrsou. Un di su bukinan ku ta hopi konosí i balorá ta: ‘Dede pikiña ku su bisiña’. E buki aki ta duna un bista históriko bon dokumentá di Papiamentu i nos enseñansa.
Outor José Manuel Dias