Edificio di SKOA – potrèt: Ariën Rasmijn
ORANJESTAD —Stichting Katholiek Onderwijs Aruba (SKOA), cu ta maneha 47 scol na Aruba cu totaal di 10.500 alumno, ta bay hisa nan tarifa di schoolgeld di 75 florin pa 250 florin desde aña escolar proximo. Motibo pa esaki ta cu e costo di educacion y aplicacion di metodonan moderno ta subi, mientras cu subsidio for di gobierno ta keda atras.
Josette Daal, directora di SKOA, na palabra
E idea ta pa e mayor paga 250 florin pa cada yiu y ningun cen mas. Pa uzo di airco sinembargo lo keda cobra 150 florin extra cada aña. Daal ta splica cu educacion na Aruba nunca tabata gratis, pero pa hopi tempo e tarifa tabata masha abou. Despues di ahustenan gradual a yega na un suma di 75 florin na aña 2000.
For di eynan e tarifa a keda igual te awo. SKOA tin un deficit di 1,5 miyon florin, cual ta producto di e diferencia di e gastonan cu ta keda aumenta y e subsidio cu nan ta haya di gobierno. Cu e ahustacion di tarifa aki, SKOA kier keda garantisa e nivel di calidad di educacion cu su scolnan ta ofrece y alabes logra sera e deficit aki den un periodo di ocho pa nuebe aña, segun Daal, cu ta mustra tambe riba inversionnan cu kier haci den sistemanan electronico di duna les.
Ya caba dos scol a cuminsa implementa sistemanan digital cu ayudo di e compania di telefon Setar y tambe Samsung. Pero mantencion di e sistemanan ta keda responsabilidad di e scolnan y di SKOA.
17 porciento no ta paga
Hecho ta tambe cu na momento aki caba y pa varios motibo, no tur mayor ta paga e schoolgeld rekeri. Alrededor di 83 porciento di e 10.500 muchanan cu ta bay scolnan di SKOA tin nan schoolgeld paga. Segun Daal, SKOA ta tuma cuenta cu situacionnan financiero precario di mayornan y ta yuda activamente pa nan haya asistencia na Departamento di Asuntonan Social.
Autor Ariën Rasmijn