Michiel Bijkerk i Luis Rodriguez Gamarro Foto Belkis Osepa
KRALENDIJK – Spesialmente imigrantenan latinoamerikano na Boneiru ta teme pa nan empleo. Na momentu ku mester prolongá nan pèrmit di trabou ta bai duna preferensia na trahadónan lokal. Ministerio di Asuntunan Sosial i Empleo (SZW) entrante promé di febrüari awor ta pone un fin na e maneho di toleransia ku a hiba pa añanan riba e tereno aki.
E hòmber peruano Luis Rodriguez Gamarro a bisa ku loke ta bai pasa aki ta bai trese hopi doló pa imigrantenan. “Esaki ta bai kousa daño i sufrimentu enorme na imigrantenan ku ta hasiendo nan trabou legalmente riba e isla. No tin stabilidat di trabou.”
Un kontribushon di Belkis Osepa
Rodriguez Gamarro mes ta traha legalmente na Boneiru komo karpinté i por sigui hasi su trabou. Pero e konosé hopi latino ku ta teme pa nan empleo i bida riba e isla. Nan ta bini for di Colombia, Venezuela, Perú, Repúblika Dominikano i tambe for di Haiti. Un parti grandi di e imigrantenan aki ta traha den sektor di konstrukshon, hóreka i dunamentu di servisio. Nan ta gana entre 4 pa 7 dòler pa ora.
Ilegal
Rodriguez Gamarro: “Tin imigrante ku a laga nan famia bin biba legalmente Boneiru. E muchanan ta bai skol aki. Ademas Si awor nan bai pèrdè nan pèrmit di trabou nan lo mester entregá tur kos. Sin pèrmit di trabou i sin trabou nan ta ilegal i mester sali for di e isla.”
E ministerio di SZW a kuminsá entrante promé di sèptèmber ku un investigashon di merkado laboral na momentu ku drenta un petishon pa prolongá pèrmit di trabou di un trahadó imigrante. Ta mèldu e vakatura pa mira ku si tin trahadónan lokal (desempleá) ku por hasi e trabou. Esaki ta stipulá den e lei di BES ku ta rigi labor di stranheronan. Sin e pèrmit di trabou aki imigrantenan — anke nan tin pèrmit di estadia — no por traha. Te 31 di ougùstùs no tabata hasi e investigashon aki di merkado laboral. Djabièrnè último a anunsiá ku lo posponé e medida.
“Dor di e intrankilidat grandi bou di tantu e doñonan di trabou komo e trahadónan for di eksterior, sigur teniendo kuenta ku nan no tabata bon prepará, a disidí di no hasi e investigashon di merkado te 31 di yanüari”, e ministerio di SZW i Gobièrnu di Entidat Públiko Boneiru (OLB) ta skirbi den un deklarashon konhunto.
E inkietut ku ta biba bou di trahadónan imigrante ta real. Abogado Michiel Bijkerk, lider di Partido Pro Hustisia & Union (PHU), ta sostené e imigrantenan i ta duna guia na un akshon di firma komo protesta kontra e medidanan anunsiá.
Preferensia
Segun Michiel Bijkerk, aki ta trata di un maneho nobo, pasobra tin sigur 10 aña ku no a apliká e lei konserní. “Natural ta asina ku trahadónan lokal mester haña trabou i tambe preferensia riba trahadónan stranhero. Pero e imigrantenan ku ta aki a bira parti di nos komunidat i nos mester trata nan nèchi.”
Bijkerk ta boga pa bini un paro di entrada di imigrante te ora ku solushoná e problema di desempleo riba e isla. Boneiru tin segun kalkulashon entre tres pa kuater mil imigrante. E medida ta toka sigur 600 imigrante.
Doñonan di trabou
Tambe e doñonan di trabou na unda nan ta empleá, ta keda perhudiká, segun e kolombiano Arnaldo Castellanos. E ta doño di un kompania ku ta hasi instalashon eléktriko. “Esaki ta kousa hopi sufrimentu pa e trahadó í e doño di trabou. Si mi tin un imigrante ku eksperensia i responsabilidat ta trahando pa kuater aña kaba serka mi, den kende mi tin konfiansa, awor ku e medida aki lo mi mester kambi’é pa un hende ku mi mester bai guia di nobo atrobe.” Castellanos tambe ta di opinion ku no mester laga imigrantenan nobo drenta Boneiru pa traha.
Entrante promé di febrüari e maneho di toleransia ku tabatin pa loke ta trata dunamentu di pèrmit di trabou definitivamente ta terminá i ku lo mantené e investigashon di merkado laboral estriktamente. Mientrastantu e imigrantenan, doñonan di trabou i Michiel Bijkerk ta sigui ku nan akshon di firma.
Outor Belkis Osepa