Habitantenan di Emmastad, Groot Kwartier i Biesheuvel a risibi yabi di C-Box – potrèt: José Manuel Dias
WILLEMSTAD – Despues di a risibí informashon i tuma yabi di e asina yamá ‘Community Mailbox’ (C-Box), habitantenan di Emmastad, Groot Kwartier i Biesheuvel, a reakshoná hopi sképtiko riba implementashon di e proyekto aki.
Ta trata aki di un proyekto piloto di CPost International, antes Pòstkantor, kaminda entrante promé di yanüari próksimo, lo no parti karta mas den e barionan ariba menshoná.
Un reportahe di José Manuel Dias
E kartanan lo keda depositá den e ‘C-Box’ korespondiente ku ta situá riba e tereno di Pòstkantor na Groot Kwartier. Na momentu ku tin karta kada habitante lo keda notifiká via di un ‘e-mail’ indikando ku tin pòst den su ‘C-Box’. Sinembargo pa e hendenan di edat avansá manera Sr. Donald, e sistema nobo aki ta trese sierto komplikashon kuné. “Si un hende no tin kompiuter ta kon e ta hasi pa haña ‘e-mail’ te p’e sa ku tin pòst p’e”, asina Sr. Donald ta puntra su mes.
Ku introdukshon di e proyekto ‘Community Mailbox’, CPost International ta spera di por baha gradualmente su gastunan di operashon sin ku esaki nesesariamente ta nifiká retiru di personal. E partidónan di karta ku bini liber lo bai hasi otro tipo di trabou manera por ehèmpel repartí paketenan. Asina direktor di operashon di CPost, Niviella Sambo, a duna di konosé.
N’e momentu aki e kompania ta pasando den un situashon basta difisil debi na un bahada drástiko den e volumen di kartanan.
Outor José Manuel Dias