Gezaghebber Edison Rijna a duna James Finies e karta – potrèt Extra Bonaire
KRALENDIJK – E grupo di protesta Nos Ke Boneiru Bèk dos be den 24 ora mester terminá nan manifestashon dilanti e edifisio di bestuurscollege di Boneiru i kita tur bòrchi di protesta. Den deliberashon ku outoridatnan i polis e grupo por skohe un lugá nobo.
Asina gezaghebber Edison Rijna a bisa presidente di Nos Ke Boneiru Bek James Finies. Te awor e grupo su manifestashonnan tabata kontra reglanan i kontra lei, Rijna a bisa den un deklarashon di prensa.
“No a pidi pèrmit pa e marcha di protesta i e manifestashon. Mi ta aploudí un pueblo bon informá. Pero tur kos mester bai segun reglanan i lei. Si no terminá e manifestashon nos mester tuma medidanan fòrsá.”, Rijna ta bisa. “E ora ei nos mes ta kita tur kos i esei ta bai na kuenta di Nos Ke Boneiru Bèk.”
Finies i e partidarionan a haña te djárason meinta 10 or pa kita tur bòrchi di protesta na bestuurscollege i tambe na Pasanggrahan, e edifisio di eilandsraad. Rijna a primintí Nos Ke Boneiru Bèk di pone un tualèt portátil na e lugá nobo di protesta.
Plenchi di igualdat – potrèt: PHU
Banki di igualdat
No ta solamente Nos Ke Boneiru Bèk a haña un karta ofishal. E partido polítiko Pro Hustisia & Union tambe haña un siman pa nan kita nan ‘banki di igualdat’, banda di Fort Oranje. Lider polítiko Michiel Bijkerk a konstruí e banki sin pèrmit banda di e fòrti i a duna e lugá e nòmber Plenchi di Igualdat.
James Finies a bisa anteriormente ku e no ta bai. E ta bai analisá e karta internamente i mas lat e siman aki e ta bini ku un deklarashon ofishal. Bijkerk tambe ta deliberá ku su apoyo polítiko.
Outor Belkis Osepa