Dr. Cai Winkel i Dr. Homan Jeung durante charla tokante di HIV

Dr. Cai Winkel i Dr. Homan Jeung durante charla tokante di HIV – potrèt: José Manuel Dias

WILLEMSTAD – Kòrsou a logra baha kosto di remedi pa tratamentu di HIV/AIDS dor di apliká pa preisnan spesial ku ta bálido pa paisnan di terser mundu. Si den pasado resien kada pashènt infektá ku HIV tabatá kosta 3500 florin pa luna na remedi, awor esaki a bira 350 florin pa luna.

Asina dòkter Cai Winkel, internista speshalista riba tereno di HIV, a informá e siman aki durante un charla organisá pa Fundashon Famia Plania.

Cai Winkel i Homan Jeung na palabra

Loke si no ta dje alentador ei ta e kantidat di kasonan nobo di HIV ku a keda registrá durante e ultimo tres añanan. Den 2013 e kantidat di kasonan nobo di HIV a yega e sifra rèkòrt di 122 kompará ku 84 kaso den 2011. Esaki ta sin konta tur e personanan ku ta infektá ku e viro di HIV sin ku nan mes sa. “Desgrasiadamente pa siman mi ta haña dos pa tres pashènt nobo”, asina dòkter Cai Winkel a duna di konosé.

Ku e meta pa yuda frena e kantidat di kasonan nobo di HIV, e aña aki a start ku un proyekto piloto kaminda un total di tres konsultorio médiko a keda enkargá pa tèst tur nan pashèntnan riba HIV.

simpel tèst
Segun dòkter Homan Jeung esaki ta sosodé via di un simpel tèst di saliva ku e dòkter di kas mes ta hasi i kaminda ta haña sa e resultado den binti minüt. Un di dos meta di e proyekto aki ta pa kuminsá desentralisá kuido di pashèntnan ku HIV i traspasá esaki pa e dòkternan di kas ku ta forma e promé liña di kuido.

Outor José Manuel Dias