Uz Everts kadená foto Belkis Osepa
KRALENDIJK – E grupo di protesta Nos Ke Boneiru Bèk ta keda manfestá pa un referèndem estatal dilanti edifisio di bestürkolezje di Boneiru. Gezaghèber Edison Rijna ta tolerá e situashon pa evitá eskalashon. E emoshonnan tabata asina fuerte, ku medidanan pa fòrsa un paro lo no a kondusí na un mihó resultado, asina Rijna a deklará.
Edishon Rijna a skone pa diálogo pasobra e ke laga interes general, seguridat i órden públiko prevalesé. Di e manera aki Nos Ke Boneiru Bèk a logra viktoria djarason ‘ultimo. Nan n a duna oido na e karta di Rijna pa terminá e manifestashon i kita tur e materialnan di protesta, stul i mesanan for dje sitio. Mas o ménos dosshen manifestante a sostene e grupo ku a intensivá nan akshon. E akshon a bai mas leu ora ku e Boneriano Uz Everts bistí den un kashaka a laga kadená su mes na porta di kura di bestürkolezje, ku kara tapá.
Ekspreshon di manifestantenan foto Belkis Osepa
Podio di ekspreshon
E protesta a bira kada minüt mas intensivo ora e ora definitivo di dies or pa terminá e manifestashon tabata aserká. E luga di manifestashon a bira un podio pa e manifestantenan ekspresá nan mes. Diferente hende a ekspresá emoshonal nan sentimentu pa ku e akshon, referèndem i deseo pa Boneiru.
Despues di a entregá Rijna un karta i a sinta pa un ora i mei na mesa ku Rijna presidente James Finies di Nos Ke Boneiru Bèk a sali satisfecho i aliviá for di e reunion. “Nos derecho a kanta viktoria. Nos ta keda aki i nan no por kita nos. Nos lucha ta kontinuá te ora nan haña un referèndem.”
Státùs quo
Rijna ta bisa ku e no a premirá ku e akshon di protesta lo intensifiká. El a traha e karta den konsulta ku su konseheronan. Pero tur kos a boltu den direkshon negativo. “Ta sobrami nada otro pa mira e realidat i tuma un desishon balansá. Sigui preshoná ku medidanan pa fòrsa nan kita for di einan òf mihó skohe pa mantené órden públiko i seguridat. E situashon ta keda státùs quo.
Rijna ta bisa ku el a wak e rabia serka algun hende riba e lugá di parker na kantor di bestürkolezje. “Nan tabata tristu i mi a mira yoramentu. E kos ta afektá ami tambe. I den situashon asinaki lo tin hende ku ta hasi kos deskabeyá. Mi no por para responsabel pa ku esei. E grupo mes a hala atras nan responsabilidat pa esnan ku ta aktua individualista.”
Kantidat di hende na e sitio Foto Belkis Osepa
Segun Rijna no tin ganadó ni pèrdèdó. Si e sigui lo tin pèrdèdó so. E no ta kere ku su kredibilidat ta hunga un ròl. E no ke hañ’é ku akshonnan negativo i ku lo ta pio ku su kredibilidat. E ta haña ku su kredibilidat ta krese serka e grupo ku ta den akshon.
E karta ku Rijna a entregá na Nos Ke Boneiru Bèk ta keda riba mesa. E ta keda para tras di e kontenido. E no por hala e karta aden, pasobra ta un echo ku e grupo no tin pèrmit pa pone borchinan di protesta, stul i mesa na e lugá. “Mi ke keda den dialogó i pa mantené pas tolerá e situashon.”
Outor Belkis Osepa