Anunsio bahada preis kombustibel – potrèt: Belkis Osepa
KRALENDIJK – Preisnan di kombustibel na Boneiru lo baha bastante for di djasabra próksimo. Gobièrnu a yega na un akuerdo ku suministradó di kombustibel Curoil. Pa kasi un aña i mei no a adaptá e preisnan. Awor lo adaptá e preisnan di kombustibel kada dos luna na e kambionan di merkado internashonal.
E preis di kombustibel na Boneiru no a baha kontrali na e desaroyo mundial di preis di petroli. Awor e preis di gasolin ta baha di 1.38 dòler pa 1.22 dòler pa liter, disel ta baha di 1.20 dòler pa 0.86 dòler pa liter.
Diputado Edsel Winklaar i direktor Curoil Yamil Lasten riba bahada kombustibel
Tambe e preisnan di e silendernan di gas grandi i chikí ta baha pa 39 i 9 dòler. Kerosin ta baha di 1.11 dòler pa lider pa 0.80 dòler. Diputado Winklar enkargá ku desaroyo ekonómiko a splika ku mester a akordá ku tur partido un preis responsabel ku tur partido por karga. “E bahada mester ta hustifiká i responsabbel. No solamente pa gobièrnu, pero tambe pa e pueblo konsumidó i den koperashon ku Curoil.
Pre-finansiá
Segun direktor di Curoil Yamil Lasten stipulashon di preis di kombustibel ta den man di gobièrnu di Boneiru. E tambe a tende e krítikanan na e isla riba e preisnan haltu di kombustibel. “Si mi mester bisa ku mi no a tende nada tempu ku e preisnan di kombustibel a subi mundialmente i ku Curoil mester a pre-finansiá e diferensha. Tur e tempu ei no a adaptá e preis.”
E pre finansiamentu di parti di Curoil a pone ku e debe di gobièrnu di Boneiru na e suministradó di kombustibel subi te 2.2 mion di dòler. Despues di negosashonnan ku entidat Públiko di Boneiru Curoil a palabrá ku e lo dispensá e montante ku a sobra di 93 mil dòler. Lasten: “Mi no ke formul’é komo pèrdida. Si mi por bisa ku el a afektá nos. Pasobra si no adaptá e preisnan, bo no por inbertí. Awor nos ta kuminsá komplétamente di nobo.”
Outor Belkis Osepa