Minister Plasterk den debate ku Bosman, Segers i Van Laar – potrèt: Jamila Baaziz
DEN HAAG – College financieel toezicht (Cft) ta bai tene kuenta ku e riesgonan finansiero di nv di gobièrnu ora nan husga e presupuestonan di Kòrsou i Sint Maarten.
Esaki a sali awe den un debate tokante e tareanan di supervisor Cft den Tweede kamer.
Si e nvnan di gobièrnu forma un riesgo pa e pais mester inkluí nan den e evaluashon”, asina minister Ronald Plasterk di Relashonnan den Reino ta bisa. Asina den práktika ta bira mas difisil pa e paisnan karibense pa optené un presupuesto aprobá.
E gobièrnunan di e paisnan ku e adaptashon aki mester pone mas preshon riba e kompanianan aki pa mustra frankesa den nan asuntunan. Te aworaki t’asina ku no ta wak e búkhouden di e nvnan di gobièrnu si e nv no entregá informashon, manera por ehèmpel ta e kaso na haf di Sint Maarten.
Fiansa
Pa fiansa ku e paisnan karibense ke sera via Hulanda ta Cft ta keda e instansha ku ta wak si ta kumpli ku e kondishonnan. Parlamentarionan André Bosman (VVD) i Gert-Jan Segers (ChristenUnie) ta puntra minister di nobo si ta lógiko ku Cft ta e úniko ku ta disidí den esaki.
Plasterk ta haña ku si: Tweede Kamer a bai di akuerdo ku e lei di reino kaminda a regla esaki. E supervisor por duna e paisnan limitashon pa loke ta e hasimentu di debe i e agregashon di gastu. Di otro banda e paisnan ta bini na remarke outomátikamente pa un registrashon koriente si nan kumpli ku e reglanan.”
Aruba
Ku Aruba Plasterk ta spera di por hasi palabrashon lihé tokante supervishon finansiero. “Den un Rijksministerraad èkstra djabièrnè nos ta bai wak kon nos por inkorporá e struktura finansiero strukturalmente.”
BES
Boneiru, Sint Eustatius i Saba riba término kortiku probablemente lo no por haña fiansa barata via Hulanda. E miembro di PvdA Roelof van Laar ta puntra pakiko esaki no ta posibel. “Espesialmente na Saba finansieramente ta bai bon i na Hulanda munisipio i provinsia tambe por fia plaka.” Pero Plasterk no ke primintí nada tokante di esaki: “Nos lo trese esaki den e evaluashon di e leinan finansiero di BES. Pasobra esaki no ta kiko ku ta. Ken por ehèmpel ta responsabel ora algu bai malu den pagamentu di e debe. Aktualmente e petishonnan pa proyekto ta bai via e ministerionan envolví. Esaki ta poko inkómodo, pero e islanan sa bon ki kaminda na mester kue.
Outor: Jamila Baaziz