Reunion ku kriadónan di porko ku Departamento di Asuntunan Veterinario | Potrèt: José Manuel Dias
WILLEMSTAD – Di un banda kriadónan di porko ta konsiente ku mester tuma medida pa redusí e kantidat di dioxina den karni di porko. Di otro banda nan situashon ekonómiko no ta duna espasio pa hasi tur e kambionan nesesario.
Asina e kriadónan di porko a trese dilanti durante un seshon informativo organisá pa Departamento di Asuntunan Veterinario. “Si nan ke pa nos drecha e stalnan anto nan mester duna nos un supsidio”, un di e kriadónan a vosiferá.
Un reportahe di José Manuel Dias
Un inventarisashon ku e servisio veterinario a hasi resientemente di e varios kriaderonan di porko rònt Kòrsou ta mustra riba un situashon bastante alarmante. Dor di situashon a-higiéniko tin hopi porko ku ta keda eksponé na e supstansia dioxina ku por kousa kanser serka ser humano.
Medida
Komo medida a instruí tur kriadó di porko pa no duna e porkonan kuminda den tera mas. Mester laga e porkonan kome sea riba betòn of den baki. Tambe ta pidi pa stòp di duna e porkonan restunan di kuminda ku ta bini por ehèmpel di ‘landfill’. Na su lugá mester duna e porkonan layena di kome. Igualmente mester stòp ku kimamentu di sushi kaminda ta kria bestia. E kriadónan tin te ku dia ocho di febrüari pa implementá e medidanan aki.
Outor José Manuel Dias