Gezaghebber Gerard Berkel ta anunsiá e resultado preliminar – potrèt Leoni Leidel-Schenk
ORANJESTAD – Esnan pro un Sint Eustatius outónomo ayera nochi a selebrá un viktoria marga. E resultado preliminar ta mustra ku, ku 747 voto mayoria a skohe pa mas outonomia, pero e referèndem no ta bálido pasobra ta 45 porshento so a vota. Un mínimo di 60 porshento tabata e eksigensha.
374 voto tabata pro status quo, pa keda un munisipio ekstraordinario di Hulanda. Segun esnan pro status quo e hendenan ku no a bin vota ta na nan banda. “Si nan ker a kambia e situashon nan lo a bini”, Marietza Patrick ta bisa. Sinku voto a bai pa e opshon independiente i dieskuater voto a bai pa integrashon.
E státùs estatal por lo pronto lo no kambia pero esaki no ke men ku esnan pro status quo ta selebrando un fiesta. “A gasta muchu plaka na e referèndem purá aki, plaka ku mihó por a usa pa otro kos”, Patrick ta bisa.
Gershon Lopes di Pro Statia ta warda e resultado
Karchi di vota
Gershon Lopes di Pro Statia no ta pèrdè kurashi. “Esaki ta un mensahe kla pa stasianonan ku nos no ta kontentu ku e situashon aktual. E partidonan polítiko mester tuma e informashon aki i hasi algu kuné.” Hopi hende pro outonomia ta reklamá ku e distribushon di e karchinan di vota no a sosodé korektamente. A entregá hopi karchi na adrès robes òf nan a keda den ofisina di senso, ku a keda habri mas largu espesialmente ayera tardi. “Sigur 60 hende ku ker a vota no tabata por pasobra nan no tabatin karchi”, Lopes ta bisa.
Gezaghebber Gerard Berkel ta bisa ku na tur elekshon sa tin problema ku karchi di vota. “Ta e hendenan mes mester paga tinu i si un siman delantá bo no tin bo karchi di vota, bo mester tuma akshon. Nò riba e dia mes.”
Mensahe
Berkel no ta mira e referèndem komo inbalido. “No tabata un referèndem obligatorio sino un mensahe di pueblo. E echo ku e mayoria di voto a bai pa outonomia ta un mensahe pero tambe e echo ku hopi hende no a bai vota. Huntu nos na Statia mester mira ta kiko esaki ke men pa e isla.”
Outor Leoni Leidel Schenk