Mylene Testing, presidente di Voedselbank | Potrét: Dulce Koopman

Mylene Testing, presidente di Voedselbank | Potrét: Dulce Koopman

WILLEMSTAD- A yega e momentu ku Banko di Kuminda na Korsou (Voedselbank ) a kuminsá sinti realmente e efektonan negativo dje paro di supsidio di AMFO, ku a tuma luga dos aña pasa. Desèmber tabata e último luna ku Banko di Kuminda a traha 300 paki di kuminda.

Entrante otro luna ta 100 famia pa luna por disponé di e yudansa den forma di paki di kuminda. E situashon aki ta di lamentá pasobra e kantidat di famia ku tin mester di yudansa ta sigui krese, i ta Banko di Kuminda ta e úniko instansha ku ta duna e sosten aki.

Mylene Testing, presidente di Banko di Kuminda a deskribí den un entrevista ku Dulce Koopman kiko e falta di sosten di AMFO ta nifiká.

Banko di Kuminda ta konsiente ku semper lo keda famianan ku tin mester di yudansa den forma di pakete di kuminda. Banko di Kuminda tin e speransa sinembargo ku e nesesidat lo no keda eksistí pa un temporada largu. Voedselbank su meta ta pa komunidat us’é komo e medio pa yuda e hendenan ku ta den nesesidat.

Mylene Testing a splika ku ta hopi importante tambe pa komunidat realisá ku no mester konsiderá e yudansa aki komo algu permanente pa e hendenan ku ta den nesesidat pero ku e sistema ta yuda esnan den problema sali for di nan situashon pertá.

Outor: Dulce Koopman