Jona Chirino foto Belkis Osepa
KRALENDIJK – “E awa di kranchi na Boneiru ku legionèla ta tòg mihó ku awa den bòter. Sigui bebe nos awa.” Esei ta komentario di diputado Jona Chirino enkargá ku salubridat públiko, relashoná ku konsternashon ku a surgi pa motibu di legionèla den awa di bebe na Playa.
Tabata e kompania di awa i energia WEB mes ku a bati alarma komienso di siman. A informá pueblo boneriano tokante un oumentu di konsentrashon di e bakteria legionèla den e ret di awa di bebe na Playa. Dos dia despues ta sigui un trankilisashon despues di análisis profundo i otro norma di midimentu.
Belkis Osepa ta papia ku Jona Chirino
Ret di awa
Direktor Alfredo Koolman di WEB ta bisa ku e awa di bebe na Playa ta na ordu apesar ku e ta kontené e bakteria legionèla. Na promé instante a hasi uso di normanan di midimentu hulandes. Esaki a mustra ku e nivel di bakteria presente den e awa di bebe a subi. A hasi e midishon di e bakteria den e ret di awa di bebe den i rònt di e edifisio nobo di e kuerpo di polis Hulanda Karibense (KPCN).
Awor ku a midi segun otro stándart adekuá pa Karibe i tambe segun otro eksigensha, tantu WEB komo Chirino ta sali bisa ku no tin motibu pa pániko. Chirino: “Tabatin un diferensha di interpretashon ku tabata motibu pa pániko serka hulandes oropeo ku ta kustumbrá ku otro normanan. E mensahe ta ku no ta awe só tin legionèla den awa. Esaki lo no stòp tampoko. Si nos por mantené na un manera seif pa salu di hende, e no mester ta peliger. WEB ta hasi esfuerso pa garantisá awa saludabel pa tur hende.”
Turismo
Probablemente e konsentrashon haltu den i rònt di e edifisio di polis tin di haber ku e edifisio a para pa algun aña bashí i na momentu ku a bai usa esaki no a tuma e medidanan di limpiesa nesesario di e ret di awa. E tipo di legionèla den e awa na Playa no ta esun agresivo tipo 1. Anke ta WEB mes a bin na promé lugá ku e notisia di konsentrashon haltu di legionèla, tòg tantu Koolman komo Chirino ta atbertí pa suministrashon di informashon robes na públiko, ku lo por tin efekto riba turismo pa Boneiru.
Outor Belkis Osepa