Taksista ta blokia kaminda den Punda
WILLEMSTAD – Tin hopi intrankilidat den e mundu di taksista na Kòrsou. Djaluna na kuminsamentu di atardi sesenta taksista a bai e sentro di gobernashon na Willemstad pa protestá kontra e situashon free-for-all ku tin riba e isla.
Segun e shafùrnan awendia ta tur hende ta ofresé kareda, sin ku nan tin e pèrmit apropiá. Si antes un buelo di KLM por a trese trinta pa kuarenta kareda, awendia e shafùrnan mester ta kontentu ku un sinku kareda pagá di aeropuerto pa hotèl.
Dick Drayer ta kombersá ku shafùr di taxi Randolph Maduro
Na Fòrti e situashon tabata masha kaótiko. A arestá taksista Randolph Maduro i a hib’é warda na Rio Canario. E or’ei e 59 otro shafùrnan a disidí di kore pia pia di palasio di gobernador pa warda di polis, loke a kousa un káos un ratu na Julianabrug.
Mantenshon di bida
Shafùr di taksi Natasja Gibbs ta spera di haña un tiki komprenshon seka e otro outomobilistanan. “Nos no ke molestiá niun hende, pero nos mantenshon di bida ta na peliger. E bùsnan di turista ta e problema di mas grandi. Wes a bisa ku nan por transportá solamente pasahero ku un estadia all-inclusive, pero bo ta mira ku tur organisashonnan di biahe ta piki nan pasaheronan na Hato, mientras ku ta un resort all inclusive so tin riba e isla. Ademas nan ta hiba e turista playa Kenepa bai i bini i pa laga esaki parse legal nan ta djis para un ratu na Landhuis Chobolobo: asina e kos ta keda manera ta un ekskurshon organisá”, Gibbs ta bisa hopi emoshoná.
Entre tur e intrankilidatnan aki e shafùrnan a entregá un karta na promé minister Asjes. Esaki a bisa ku e lo studia e situashon.
Outor Dick Drayer