Djis promé ku Pasku ainda pedido ta drenta na Bandabou Catering na Amsterdam – Potrèt : John Samson
AMSTERDAM – Kos ta bon pa kompanianan di catering antiano na Hulanda. Kasi tur catering antiano na kuminsamentu di siman di Pasku mester a stòp di tuma pedido.
Asta djis promé ku bispu di Pasku ainda telefon ta drenta di kliente ku te den lat ke ayaka i un ham di Pasku.
“Ounke nos a pone un mensahe riba nos website ku nos no ta tuma pedido mas, ainda nan ta yama nos na telefon. Nos mes tambe ke selebrá Pasku, ke men ku lástimamente nò ta keda nò”, Junio Ignacio di Antilliaans Eten ta konta.
Ayaka fresku herebé: un pakete di yerba di banana yená ku entre otro karni mechá den un mansa di ariña di maishi
Pasku sin ayaka no por
Crystal Henriques a biaha un ora i mei for di su kas na Apeldoorn pa Amsterdam espesialmente pa buska loke el a bestèl pa Pasku. “Mi ta sinti falta di mi isla i un ayaka ta e úniko pida Kòrsou ku mi por haña den e friu aki”, Henriquez ta bisa kontentu di su alma, mientras e ta yena su tas ku ayaka i un ham gordo.
Na Amsterdam na Bandabou Catering for di òktober pedido ta drenta pa Pasku i Aña Nobo. Kontrali na e otro cateringnan nan tin mas difikultat pa bisa ‘nò’. P’esei den tempu di Pasku for di nueb’or di meinta te tres or di mardugá ta traha. Amantenan di kushina antiano ta bin buska 150 kilo di ham di Pasku i 600 ayaka na e kompania aki. Pero tambe sùlt di orea, pekelé i empaná ta pidi hopi.
Na Vicento Taarten na Zoetermeer banda di desena di bolo antiano tin pedido pa mas ku 500 ayaka. “Aki nos ta masha okupá mes! Hendenan sa para den rei mei dos ora largu pa haña nan pedido, asina okupá ta e aña aki”, doño Taizy Vicento ta bisa.
Sa pidi bolo mas be den e pedidonan pa Pasku. Pa e fanátiko di kushina antiano no por falta bolo di kashupete. Es ku ke paga un mínimo di 85 euro pa un liber di bolo, ta bai pa e bol’i preimu. E rei di bolo antiano aki ta tuma diferente luna di preparashon i p’esei ta trah’é pa momentonan spesial so.
Bèlgika
Na Gent na Bèlgika tambe ta hasi pedido seka Sha’s Exotic Snacks pa e pakete spesial di fin di aña. “Seka nos ta nèt esnan ku no ta antiano ta hasi pedido mas parti, e belganan”, Sharelly Regina ta konta. Kushina antiano ta haña mas i mas fama na Bèlgika. Hopi be nan tin sea kolega antiano òf nan a bishitá e islanan un be.”
Outor John Samson