Ishya su kurpa tabata kontené solamente un kòpi chiki di sanger – potrèt: Marieke Stegeman
WILLEMSTAD – Ku su wowonan grandi Ishya Narain ta wak mundu ku hopi kuriosidat. E tin shete luna, pero su desaroyo ta di un beibi di mas o ménos kuater luna. Ishya a nase tres luna muchu trempan i tabatin un retraso di desaroyo di un luna mas. Den e promé seis lunanan di su bida e chikitin a superá infekshon, kuminsamentu di meningitis, chikungunya i dos operashon di tripa.
Ishya ta un di e motibunan pakiko un tim di médiko i otro personal di e departamentu di mucha na SEHOS a lanta Fundashon Mucha pa Mucha. E fundashon su meta ta pa hasi trato den hòspital di mucha ku ta malu agradabel pa mucha.
Dia Ishya a nase e tabata pisa 755 gram i e tabatin un largura di 34 sèntimeter. “E no por a hasi nada su mes”, Ishya su mama Marieke Stegeman ta konta. “Kome, hala rosea: tur kos tabata bai via aparato.” Pa monitòr i kontrolá Ishya regularmente mester a tèst su sanger pa infekshon. Ora a resultá ku e tabatin un infekshon di tripa, a kue su sanger asina tantu be ku kasi e no a sobra sanger mas. “Su kurpa tabata kontené manera un kòpi chiki di sanger. Ku tur e sanger ku a kue seka dje e tabatin mester di un transfushon di sanger i esaki ta trese riesgo.”
Kue sanger na kabes
Stegeman ta konta ku un di e metanan di Mucha pa Mucha ta pa kumpra un I-stat. E aparato aki ta evitá ku beibi ta pèrdè muchu sanger pa motibu di kuementu di sanger. “E sanger ku kue hopi be a kuaha kaba te ora e yega laboratorio. Seka Ishya esaki a pone ku mester a kue sanger kuater òf sinku be. Ademas na final no a sobra niun ader mas i asta mester a kue sanger na su kabes.”
Ishya ku su mayornan na hòspital – potrèt Anand Narain
A lanta Mucha pa Mucha na òktober di aña 2014 i entretantu via un fundraising nan a haña sufisiente plaka pa un I-stat. “A bestèl e aparato i e ta na kaminda pa Kòrsou”, Joanne Wieringa ku a tuma e inisiativa pa Mucha pa Mucha ta konta. Un próksimo meta ta pa kumpra un aparato pa midi bilirubina. “Ku e aparato aki sin hinka e beibi ku angua nos por mira kua beibi su bilirubina ta muchu haltu. Pasobra esaki por kousa daño na sesu.”
Kada sekònde ta konta
Otro aparato ku e fundashon ke kumpra ta e Lanterna Chicco ku ta imitá e batimentu di kurason di e mama pa trankilisá un beibi, mosketero pa e wignan i un boradó di wesu di emergensia. “E último aki ta yuda nos trata mucha ku ta malu pa muri. Ora kada sekònde ta konta, ku e borado di wesu aki masha lihé nos por duna e pashènt chikí líkido, remedi i transfushon di sanger.” E personal di hòspital mes a traha e lista di aparato, hopi be for di nan propio eksperiensha den otro hòspital.
Sikatris
Dia 25 di sèptèmber Ishya a bai kas. Na kuminsamentu mester a kustumá hopi pero poko poko Ishya i su mayornan a kustumá ku nan bida nobo. Mientras ku e sikatrisnan síkiko di su eksperienshanan ta kita poko poko, e sikatrisnan físiko semper lo keda visibel. Riba su barika tin asina un kòrtá di e operashon di tripa i tur kaminda rònt su kurpa tin mancha chikí sin pigmènt di e kuementu di sanger. Pa Stegeman esaki no ta importante aworaki. “Nan a bisa mi asina tantu be ku e lo no sobrebibí, pero milagrosamente el a sobrebibí. Awor nos por hasi tur kos i tin bon chèns ku e ta krese bira un dama salú i bunita. Di tur manera lo e tin algu di konta ora e bira grandi.”
Outor Elisa Koek