Mario Martis ta yena su tas - foto Sofie Custers

Mario Martis ta yena su tas – potrèt: Sofie Custers

KRALENDIJK – E nesesidat di Bonerianonan ku un entrada abou ta grandi speshal durante e dianan di fiesta. Nan tambe ke algu èkstra òf selebrá kambio di aña festivo.

Den e pakete di kuminda di Adra Food Pantry no tin un ham di Pasku, pandushi di Pasku, ayaka òf olibòl. No opstante di esei tòg esnan di ménos rekurso ta aliviá ku loke nan haña.

Un reportage di Belkis Osepa

Komestibel
Ta e delaster djaweps promé ku Pasku. Ku pasenshi e Bonerianonan den e rei na entrada di Adra Food Pantry ta skùif bai dilanti. Nan tin den nan man dos te tres tas di kompra bashí. Nan ta warda riba nan pakete di kuminda ku produktonan básiko i un porshon di bèrdura. Te dilanti tin e kratnan yená ku komestibel. Por ehèmpel aros, funchi, cornflakes, djus, lechi, pure di batata, pindakas òf djèm.

E penshonado Mario Martis (69) di Antriol ta sinta warda ku pasenshi pa e trahadónan di Adra Food Pantry kaba kontrolá su datonan. E no ta sigur ainda ku e ta bin na remarke pa un pakete di kuminda. Despues ku el a haña lus bèrdè el a bai buska su sakunan di kompra na kas. Anke e no ta haña kosnan èkstra pa e dianan di fiesta, ku alegria e ta paketá su produktonan hinka den tas. “Mi ta un persona simple. E plaka ku mi ta haña no ta sufisiente. Bida ta duru. Imaginabo, un bleki di sòpi di berdura ta kosta kasi sinku dòler. Mi no por pag’é, sino mi no por kome mayan. Loke mi ta haña awor ta mas ku wèlkòm.”

Oumentu
Edward Sedney ta sekretario di Adra Food Pantry i ta soru pa kordinashon i e banko di data. E ta mira un oumentu di e kantidat di hende ku ta bin tuma un pakete di kuminda. Na yanüari e kantidat tabata 92, febrüari 124 i na òktober el a subi te 162. “E situashon soshal-ekonómiko no ta bira mihó. Pobresa ta krese. Nos ta ripará esei na e kompranan den supermerkado. Un hende ku solamente un ònderstant òf penshun no ta lokra ku e plaka ei.”

Hopi pakete di kuminda pa repart'i - foto Sofie Custers

Hopi pakete di kuminda pa repart’i – potrèt: Sofie Custers

No solamente hende ku ònderstant i penshun só ta akudí na Adra. Sedney ta konta di hende ku tin trabou, pero nan entrada ta bou dje sueldo mínimo. E partimentu di pakete di kuminda ta outimatisá. Reim dies organisashon òf instansha ta manda hende ku ménos rekurso pa tuma un pakete. Pa luna Adra Food Pantry ta repartí por medio 180 pakete. Gobièrnu ta finansiá 150 i Adra mes ta kubri gastu di trinta. Esnan di ménos rekurso ta haña tres luna largu un pakete. Despues nan ta Sali for di e sistema pa otro hende haña un burt.

Humanitario
Adra ta para pa Adventist Development Relief Agency ku ta un organisashon mundial humanitario di Atventista di Shete Dia. Nan ta yuda esnan di ménos rekurso ku ta haña ayudo di kuminda, pa nan yuda nan mes. Aparte di e pakete di kuminda nan ta siña manehá e tiki sèn ku nan tin i tambe sigui kurso di kushinamentu i di kose. Tambe tin kurso di terapia di famia. Sedney: “Nos no ta duna solamente e piska, pero nos ta siña nan piska tambe.”

Outor Belkis Osepa