Un di e kasi 12 mil aksidentenan di tráfiko pa aña na Kòrsou | Potrèt: Bea Moedt
WILLEMSTAD – Un siman promé ku fin di 2014 e konteo di morto den tráfiko ta 19. Si bo kore pasa Post 5 di Isla bo ta mira e bòrchi di registrashon di Vereniging Veilig Verkeer Curaçao (VVVC) ku ta registrá e kantidat di víktima.
Den realidat tin mas víktima. Segun presidente Rignald Cristina tur viktima mortal no ta sali den estadístika. E kantidat berdadero e aña aki ta 23. Segun Cristina kuater víktima no ta kai den e definishon ku polis ta usa.
Asina no ta konta un señora portugues ku ta dal ku su outo bispu di aña nobo, pasobra e ta fayesé te algun siman despues. Pedro Koeiman di 29 aña tampoko no ta konta: e ta fayesé den un kareda di pusta na Jan Noorduynweg, fin di yanüari. Riba 9 di februari Julian Jansen ta bira malu sintá tras di stür i e ta dal den un muraya. E tampoko no ta konta. Meskos ta e kaso di Francisca Amanda. Outo ta trap’é intenshonalmente na kaminda José Antonia i p’esei e no ta sali den e sifranan.
Meskos ku añanan anterior
Diesshete di e víktimanan a kai den anochi òf den mardugá. No ta kontrolá riba alkohòl pero ta sospecha ku serka diesun aksidente alkohòl a hunga un rol. E kaminda pa Westpunt for di e rotònde na WTC i Schottegatweg tin e kantidat di mas grandi di morto den trafiko: 14. Ta e kayanan kaminda por kore duru. Sinku víktima mortal tabata na pia.
Loke e sifranan aki ta pinta no ta diferente for di e añanan anterior. Esaki ta loke Algemene Rekenkamer (ARC) tambe ta konkluí den su estudio di Seguridat den Tráfiko, ku a publiká na kuminsamentu di 2014. Eiden ta mustra riba gobièrnu ku no ta duna prioridat na seguridat den tráfiko. E konklushon aki Rignald Cristina ta saka algun aña kaba.
Faya
E estudio di Seguridat den Tráfiko no ta mustra solamente ku gobièrnu ta faya den su maneho pa hasi tráfiko mas seif, sino tambe ku e otro partnernan den esaki ta hasi kiko ku ta numa. Asina no tin niun relashon entre inseguridat den tráfiko i kòntròl di polis, segun ARC. Tin un obligashon di resultado pa kada polis (un mínimo di prosès verbal ku mester skibi), ku por realisá ku tiki esfuerso. Segun ARC no tin niun motivashon pa un polis pa e skibi un but.
Kuerpo di polis no ta mantené estadístika i e banko di dato di CRS, e organisashon ku na nòmber di e kompanianan di seguro ta trata aksidente den tráfiko, no ta aksesibel pa otro hende. No tin relashon entre mantenshon di kaminda i seguridat den tráfiko; no ta hasi nada na e partinan di mas peligroso riba kaminda.
Legislashon
Na Kòrsou no tin responsabilidat di plachi di number tampoko, pa asina por saka potrèt di hende ku por ehèmpel ta pasa den lus kòrá i but nan. E ofensornan semper por bisa ku no ta nan tabata na stür. Introdukshon di legislashon nobo mes ora lo pèrkura pa un kantidat grandi di delito den tráfiko pasa di derecho penal pa derecho gubernamental.
Na 2014 parlamento a reuní dos be tokante seguridat den tráfiko riba e isla. Ademas ta insistí serka gobièrnu pa bini ku un plan pa un tráfiko mas sigur riba e isla. Segun e diferente partidonan di gobièrnu i di oposishon, un aña despues ainda no a sosodé nada ku e rekomendashonnan di ARC. E estudio di ARC ta den lachi di ministerio di Hustisia i Tráfiko i Transpòrt. Minister Earl Balborda di Tráfiko ainda no a reakshoná riba pregunta tokante e rapòrt.
Outor Dick Drayer