Akisdente resien riba Kamind'í Rincon - foto Bòi  Antoin

Akisdente resien riba Kamind’í Rincon – foto: Bòi Antoin

KRALENDIJK – Sinku Boneriano a pèrdè nan bida e aña aki despues di un aksidente serio riba Kamind’i Rincon. E delaster dos víktima a muri 24 di desèmber último despues di un akisdente. Segun sifranan te ku sèptèmber di Kuerpo Polisial Hulanda Karibense (KPCN) velosidat haltu ta hunga un ròl grandi.

Boneiru a konosé te ku awor e aña aki seis morto den tráfiko. Na 2013 a fayesé kuater persona despues di aksidente den tráfiko i e aña anterior e kantidat tabata kuater.

Un reportage di Belkis Osepa

Choke di outo
Kamind’i Rincon ta un kaminda largu di mas o ménos 14 kilometer ku ta konektá Kralendijk ku Rincon. Dos hòmber hóben di 28 i 25 aña a muri djarason anochi n’é sitio mes riba Kaminda di Rincon debi na e multiple leshonnan ku nan a risibí durante e choke di outo. Nan dos tabata sinta den e outo ku ta bai Rincon. E choke tabata ku un SUV ku tabata bin di Rincon den direkshon di Kralendijk. Den e SUV tabatin 2 adulto i sinku mucha. Nan a sufri leshon, pero di ménos gravedat.

E kousa di e aksidente no ta konosí ainda. Polis di tráfiko ta hasiendo e investigashon. Dor di e dañonan na e outonan i e impakto di e aksidente no por eskluí ku velosidat a hunga un ròl. Te ku sèptèmber e aña aki a tuma lugá 654 aksidente di kua 205 ta trata di infrakshon di artíkulo 53. Esaki tin di aber ku falta di tenementu di distansha i e falta di no adaptá velosidat. E sifranan di mitar aña di KPCN (te ku yüli 2014) ta mustra un bahada di e kantidat di aksidente, pero un oumentu di e kantidat di morto den tráfiko.

Historia
Funshonario di KPCN Junny Lopez, hefe di e departamentu di Informashon i Sosten Operashonal, a informá na òktober ku na 2013 e kantidat di aksidente a surpasá mil. Esaki ta pa promé bia den historia di Boneiru. E aña aki no a tèrminá ainda, pues no ta konosí si e aña aki tambe a surpasá mil aksidente. E kantidat di 654 (te ku sèptèmber) ta kontené e aksidentenan ku daño material i tambe e akisdentenan fatal.

Bombero mester a kòrta e outo habri pa saka e víktimanan - foto Bòi Antoin

Bombero mester a kòrta e outo habri pa saka e víktimanan – foto Bòi Antoin

KPCN a kuminsá na sèptèmber ku un kampaña pa fomentá seguridat den tráfiko. Ta trata di un kampaña realístiko kaminda públiko ta konfrontá di un manera direkto ku e konsekeunshanan di komportashon den tráfiko insigur i iresponsabel. Entre otro víktimanan ta konta nan eksperensha personal i konsekuensha di un aksidente di tráfiko. Den un spot na radio un mucha hòmber ta konta ku ora e pone gèl den su kabei e no ta bisti hèlm. Despues bo ta tende un choke pisá.

Efekto pa shòk
Lopez: “Ta importante pa e usadó di tráfiko ta konsiente di e reglanan den tráfiko. Tambe nos ke krea un efekto di shòk. Mas konsientisashon ta nifiká mas responsabilidat den tráfiko.”

Aparte di velosidat haltu tambe ta skor haltu e falta di bistimentu di faha di seguridat, yama na telefòn durante korementu di outo, korementu di outo bou di influensha di alkohòl, kore outo ku glas skur i kore sin hèlm. Outomobilistanan a duna di konosé durante un rekorido kòrtiku kun an ta konsiente di e reglanan pa un tráfiko sigur. Tòg nan ta kometé infrakshon pasobra no tin obligashon. Tambe e infrakshonnan manera falta pa duna preferensha, kore na man drechi, bèk di un manera responsabel meresé atenshon.

Ordenansa di tráfiko
Pa algun tempu kaba ta tahando riba un ordenansa di tráfiko. Lopez ta spera ku aña benidero e ta keda kla. “Nos tin un ordenansa ku ta data di 1957. No ta asina ku no tin lei. Awor lo amplia e lei i yega na formulashonnan mas klaro.” Polis lo haña mas espasio i outoridat pa aktua kontra esnan ku ta kometé infrakshon den tráfiko.

Kaminda pa Rincon ta un kaminda largu kaminda hopi bia ta kore duru. No tin lusnan di tráfiko ni drèmpel. E kampaña di konsientisashon di polis ta tèrminá fin di e luna aki. No ta konosí ku si lo prolongá esaki. Na yanüari lo anunsiá e sifranan di tráfiko di 2014.

Outor Belkis Osepa