Boluntario di Kiva Curaçao ta reuní na Leiden tokante e proyektonan ku nan tin ta kore pa nan grupo di sosten – potrèt di archivo: John Samson
HILVERSUM – Den komunidat antiano na Hulanda mas i mas hóben ta hasi trabou di boluntario òf di direktiva. Último añanan tambe studiante i profeshonal hóben antiano a lanta mas organisashon, mientras ku e fundashonnan i asosiashonnan establesé ta pasando den mal tempu.
Aña 2014 pa organisashonnan antiano tabata un aña pa resolvé problema. E organisashonnan di hóben a disidí pa bai koperá hopi. Nan no ke warda e generashonnan mas bieu, ku segun nan ta tuma muchu tempu pa tuma desishon. Vereniging Antilliaans Netwerk (VAN) ta e úniko asosiashon ku a djòin e hóbennan den firmamentu di un deklarashon di intenshon den hèrfst di aña 2014.
Peliger
Kaminda e eksperiensha ku e hóbennan antiano ta haña durante nan trabou di boluntario ta kontribuí hopi na nan desaroyo personal, ta resultá ku eksistensha di e organisashonnan nobo aki ta na peliger tambe pa motibu di esaki. “Planeá, organisá i hasi trabou di nètwèrk. Bo ta siña asina tantu kos ora bo ta den un organisashon ku na un dado momentu bo ta haña inspirashon pa ehekutá bo propio plannan”, asina Marc Castillo (26) di e klup popular di studiante ByGonga na Rotterdam ta remarká. “Nos tur ta emprendedó. Esei ta e motibu ku e enkuentronan no ta masha frekuente e dianan aki.”
Na Kiva Curaçao, e representante di studiante i profeshonal hóben di Kòrsou, nan ta mira meskos sosodé. “Kasi tur nos èks miembronan di direktiva na un dado momentu a muda pa Kòrsou i ei a kuminsá ku inisiativanan ekstraordinario manera por ehèmpel Startup Curaçao i Skèmpi”, bosero di Kiva Hassnah Elhage (27) ta bisa. Nos no tin niun problema pa haña miembro di direktiva i boluntario nobo. Espesialmente nos studiantenan no por warda pa nan kuminsá haña eksperiensha nobo. Esaki ta kousa ku algun proyekto ta kore retraso, pasobra henter ora bo mester familiarisá hende nobo.”
Mas mòndu
“Bo ta ripará ku nos hóbennan na Hulanda ta bira mas i mas mòndu. Nan sa bon kon usa social media i ta usa método kreativo pa alkansá nan hendenan. Bo por bisa ku e organisashonnan di hóben ta mas eksitoso den mobilisashon di nan grupo di sosten”, Elhage ta bisa. “Pero esaki no ke men ku nos por sin e generashonnan mas bieu, nan tin hopi eksperiensha ku komunidat antiano i polítikonan. Nos por siña hopi di nan.
Lucha
Hopi di e organisashonnan antiano ta lucha ku nan propio plannan òf ta stòp di eksistí. Despues di 25 aña Vriendengenootschap Nederlandse Antillen en Aruba (VNAA) su último oranan a bai aden. Movimento Antiano i Arubano pa Partisipashon (MAAPP) tambe ta stòp di eksistí.Tin un investigashon ta kore kontra e èks presidente di e organisashon aki pa motibu di plaka di supsidio ku a disparsé.
Overlegorgaan Caribische Nederlanders (OCaN), e organisashon antiano ku mas tantu influensha na Hulanda, for di yanüari 2015 mester bai traha ku hopi ménos plaka, pasobra reino no ta duna mas supsidio. “Nos ta reorganisando. Esei ke men ku nos mester wak si nos ta kapas di generá finansa nos mes. Pero nos ta sigui komo organisashon di boluntario profeshonal,” presidente di OCaN Glenn Helberg (59) ta bisa.
E fundashon nobo grandi di 2014 ta fundashon CN, manehá pa hóbennan mes. “Ainda nos ta den e fase di komienso”, Jai’rus Barry (26) ta konta ma e no ke reda muchu. “Nos ta realisando poko plan masha bunita. Por ehèmpel na 2015 nos ta bai ofresé hóbennan ku bin studia na Hulanda e oportunidat pa hasi trabou di boluntario na Oropa.”
Outor John Samson