Potrèt: Dick Drayer

Potrèt: Dick Drayer

WILLEMSTAD – Habitantenan di e bario Charo a fada. Nan ke pa awor porfin gobièrnu duna atenshon na e situashon di tráfiko insigur den nan bario. Djabièrnè atardi un vehíkulo a trapa Sophia de Koop di tres aña di edat na Piscaderaweg i el a fayesé djadumingu.

 
Segun e bario e kaminda ta un karetera mortal di kore pusta, na un kaminda ku e último añanan tabatin desena di aksidente i kuater morto. Djadumingu atardi nan a pone énfasis riba nan mensahe i a tene Piscaderaweg será un ora largu.

Un reportahe di Dick Drayer

Ku outo i kos di tira afó a lanta barikada na e krusada di Piscaderaweg i Wanapaweg i e habitantenan a subi kaya. E mayornan di Rianne Hellings ta biba na e krusada di mal fama ei. Na 2011 – meskos ku Sophie djabièrnè último – e tabata di bishita ora ku dilanti kas un outomobilista koriendo ku velosidat haltu a dal e, anto pa kolmo e outomobilista no tabatin seguro.

 
Drèmpel di tráfiko
E tempu ei tambe a hiba akshon, i polítika den persona di minister di Tráfiko di e tempu ei Hensley Koeiman a primintí di pone drèmpel, pa asina pone outonan baha nan velosidat. Na Piscaderaweg no a pone drèmpel.

 
E habitantenan a trata di laga e minister responsabel aktual bini Piscaderaweg, pero nan no a logra. Segun Rignald Fidal, bosero di e bario, Minister Earl Balborda di Tráfiko mester bini ku un bon relato aki dos siman. “Sino nos mes ta pone un drèmpel, ma ainda mi no sa kon haltu.”

Outor Dick Drayer