Trahadónan di WEB trahando duru pa hasi reparashon | foto Extra Boneiru
KRALENDIJK – Boneiru ta hala rosea aliviá despues di anunsio di distributor di elektrisidt WEB ku no tin mester deskonektá koriente mas. Por lo pronto ta garantisá suministro di koriente, despues di e blackout total djasabra último. Direktor finansiero Albert Schoonderbeek ta papia di un akshon intenshonaal pa hasi daño na e ret di koriente.
Anteriormente e chèns tabata grandi ku lo e isla lo a keda sigur ocho ora sin koriente djadumingu. E tempu tabata nesesario pa hasi trabounan di reparashon na e kabelnan dañá di e ret di koriente. Djasabra marduga Boneiru a lanta spantá despues di e blackout ku a dura te lat parti mainta. E interupshon di koriente ta okashoná pa daño na e kabel prinsipal ku ta transportá koriente.
Akshon intenshonal
WEB ta tuma e kaso hopi na serio. Ya polis ta hasiendo investigashon. Ya e kompania a duna di konosé ku posiblemente tin kuestion di sabotahe. Schoonderbeek: “A hasi hopi esfuerso pa kometé daño na e ret. Ta un akshon intenshonal, un destrukshon no ta bai dje leu manera loke a sosodé.
Produsente di energia ContourGlobaal i WEB tabatin miedu ku tambe e di dos kabel di alta tenshon a sufri daño serio. E di dos kabel ta e back-up pa suministrá koriente na e isla. Awor a hasi trabou di reparashon na tur dos kabel den fase i a remplasá e partinan dañá sin ku mester a kita koriente.
Kabel kimá | foto: Extra Boneiru
Konosementu
Schoonderbeek ta informá ku a usa kandela pa e destrukshon. WEB no ke adelantá riba e resultadonan di e investigashon di polis. Si ta klaro ku e malechornan a hasi hopi esfuerso pa kometé e daño. E suseso a sosodé nort di e anterior plantashi Karpata. E kabelnan en kuestion ta algun meter bou di tera kantu di un kaminda di tera den un kondishon deplorabel. E kabelnan ta kore di e planta di elektrisidat nobo di ContourGlobal, pasa Ser’i Sùit pa bai Playa. E malechornan tabata sa unda e kabelnan ta i mester a koba pa yega na nan.
Segun WEB no por eskluí e posiblidat ku nan tabatin konosementu di e kabelnan. Schoonderbeek: “Konosementu tabata esenshal, pasobra bo mester sa unda e ruta di e kabelnan ta kore.” Tambe Roy Silberie, mènedjer di e kompania di maneho di WEB ta konvensí. “E tabata sa unda hasi mas daño. Nos ta papia di un kabel ku ta e ader prinsipal pa suministrá henter Boneiru ku koriente.” Schoonderbeek: “Esaki no ta hasi daño na WEB só, pero henter komunidat boneriano. Mi ta spera ku nan ta konsiente di e impakto. Niun hende no ta gana nada ku loke a pasa.”
Outor Belkis Osepa