Potrèt: José Manuel Dias
WILLEMSTAD – Despues ku pa hopi aña Kuerpo di Bombero mester a traha ku ekiponan bieu i defisiente, último dos aña por nota ku a kuminsá remplasá esakinan pa ekiponan nobo. E mas resiente atkisishon di Brantwer Kòrsou ta un ‘tankwagen’ ku tin un kapasidat di tres mil galòn di awa.
“E kantidat di awa ku e trùk aki por karga ta ekivalente na esun di tres trùk regular di paga kandela huntu”. Segun komandante di Brantwer Kòrsou, Elvin Regina, ta e intenshon pa husa e ‘tankwagen’aki solamente ora ku mester transportá hopi awa.
José Manuel Dias den kòmbersashon ku komandante Elvin Regina
E trùk nobo a yega Kòrsou bispu di aña nobo pero ta djamars último a saké for di waf. A hibé na e díler Venequip Curaçao pa un inspekshon general pa despues kuminsá pone tur e emblemanan di Brantwer Kòrsou riba dje. Tambe lo bini un instruktor for di e fabrika pa instruí e personal di Kuerpo di Bombero riba funshonamentu di e diferente ekiponan ku tin riba e trùk. Komandante Regina ta kalkulá ku denter di dos siman e ‘tankwagen’ lo ta den operashon.
Flota
Ku atkisishon di e ‘tankwagen’ aki e flota di Brantwer Kòrsou ta oumentá na dies vehíkulo di paga kandela. Sinembargo no ta tur vehíkulo eksistente ta funshoná optimal. Awor ku tin ekiponan nobo lo bai saka tur ekipo bieu ku no ta funshoná bon for di servisio i hasi e reparashonnan nesesario.
800 mil florin
Kontrali na e pedido anterior e biaha aki ta otro kompania tabata enkargá ku importashon di e trùk di paga kandela nobo. Esaki ta resultado di un destaho públiko ku a tene i kaminda e kompania lokal 24/7 Wegenwacht tabatin e mihó oferta i a gana e destaho públiko. E trùk di paga kandela ku a keda importá ta di e marka Rosenbauer i ta trahá riba un chasis di e marka International. Ku tur kos inkluí e ‘tankwagen’ nobo aki a kosta alrededor di 800 mil florin.
Outor José Manuel Dias