Presidente di OCaN Glenn Helberg (59) – potrèt: John Samson
AMSTERDAM – Presidente di OCaN Glenn Helberg ta baha riba término kòrtiku. Asina e kabesante di e organisashon antiano di mas konosí di Hulanda a laga sa. Helberg ta haña ku a bira tempu pa un bientu fresku.
“Awor mi ta den e fase di mi bida pa pasa e trabou pa otro hende”, Helberg ta bisa. Promé Overlegorgaan Caribische Nederlanders (OCan) mester buska un susesor adekuá. E eksigensha di mas grandi segun Helberg lo bira un hende ku no ta tuma e funshon di presidente pa karisiá su ego.
Mira bèk
Helberg ku ta sikiatro for di 2008 ta presidente di OCaN. E organisashon tin trinta aña kaba ta empeñá pa hulandes karibense na Hulanda. “Nos ta nifiká hopi pa nos komunidat na Hulanda. Nos a usa tur influensha polítiko ku nos tabatin disponibel. Wak kuantu be Tweede Kamer ta menta OCaN”, Helberg ta bisa mientras ku e ta mira bèk.
“Último añanan kada be nos a stroba ku gobièrnu hulandes a tuma medidanan diskriminatorio. Por ehèmpel nos a resisti lei di Bosman i e Verwijsindex Antillianen. Pero nos a lucha hopi duru tambe pa mas atenshon pa paternidat i pa akseptashon di homoseksualnan bou di antiano.”
Trabou intensivo
“Esaki no tabata djis hasi trabou di boluntario un ora pa siman, pero un trabou intensivo aseka. Esei ke men ku tin hopi kos ku bo no por hasi. E ta brua henter bo bida”, Helberg ta konta. Na aña 2013 e ta risibí un kondekorashon real pa su esfuersonan.
Helberg no ta kompletamente satisfecho ku su propio presidensia: “E kosnan ta kana manera nan ta kana, pero mi ker a logra mas si ta trata di nos hóbennan na Hulanda.” Helberg ke pa hóbennan hulandes karibense na Hulanda koperá mas ku e generashonnan mas bieu, pa asina un pasamentu di konosementu i sabiduria tuma lugá
Retiru
Awor ku supsidio di gobiernu a para, OCaN a hañ’é obligá di retirá su trahadónan. “Nos ta papia di trahadó ku un reda sosial masha amplio i ku masha hopi konosementu di komunidat antiano. Nan bal oro. Ta doloroso pa manda bo hendenan bai, pero tambe ta doloroso ku nos mester laga hende ku masha hopi sabiduria bai”, segun Helberg.
Outor John Samson