Meinta trempan na e lugá di protesta | potrèt: Belkis Osepa
KRALENDIJK – “Ainda tin posibilidat pa un solushon. Asina mi no mira esaki mas mi por ehersé ménos influensha pa kalma e situashon.” James Finies, lider di e grupo pro referèndem Nos Ke Boneiru Bèk (NKBK) no ta zona optimista. Seka e demonstrantenan presente por skucha rabia i amargura. No por ekskluí akshon nobo kontra e manifestashon di NKBB.
Por sinti e tenshon na e hèki di bestuurskantoor di Boneiru despues di sigur sesenta dia di protesta. NKBB masha dia a spera un apertura. Un apertura pa organisá un referèndem estatal promé ku e elekshonnan lokal di 18 di mart.
Belkis Osepa den kòmbersashon ku James Finies
Segun NKKB e referèndem tin influensha riba e status estatal aktual di Boneiru. Tòg Finies ta kere ku un referèndem por tuma lugá ainda. “Nos ta keda pidi atenshon p’esaki. Pero pueblo ta pèrdè pasenshi. Nan a fada. Hendenan ta bisa: Laga nos sa ora bo no por mas.”
Insidente
No ta ripará e tenshonnan solamente na e lugá di protesta. Tambe ta relashoná un seri di insidente di último simannan ku e manifestashon. Hendenan deskonosí a susha murayanan na Playa i un monumento den sùit di Boneiru. Por a lesa tekstonan insultante i ofensivo banda di un pintura di un suastika. Informalmente ta duna e grupo di protesta falta tambe di e sabotahe di e ret di koriente kuminsamentu di yanüari, ku a kousa un blackout total.
E interpretashon di un invitashon na James Finies pa pasa djaluna na fiskal mayó di Hustisia Henry Hambeukers pa sera konosí personalmente ta típiko pa e tenshonnan. Finies a yega na e enkuentro huntu ku su abogado i un partidario.
Ministerio Públiko (OM) mes dia a manda un komunikado di prensa ku un splikashon. Ora ku a manda e invitashon no tabata kla ku tabata trata di un seramentu di konosí personal. “El a haña e impreshon òf el a tene kuenta ku komo lider di NKBB ta den kuadro di kualke investigashon penal a invit’é pa bin kombersá na OM.” Hambeukers a enfatisá ku e no a papia ku Finies komo testigu òf sospechoso.
No por sigui sin interupshon
Djasabra último e lidernan di frakshonnan den eilandsraad a reuní urgentemente tokante e duramentu largu di e manifestashon. No a palabrá nada konkreto. Espesialmente e partidonan di gobièrnu ta haña ku e manifestadónan no por sigui sin interupshon. Un esfuerso di gezaghebber Edison Rijna kuminsamentu di desèmber pa para e manifestashon a faya.
Finies ta konsiente ku e situashon por sali for di man. E mes ta bisa ku el a tuma nota di e insidentenan for di den korant. “Nan ta ekspresá nan mes asina pasobra nan ta sinti nan mes oprimí. Pa motibu di manipulashon i chantahe nan no por ekspresá nan mes libramente. Naturalmente ta trata di nos lucha pero ami no a duna òrdu p’esaki.”
Guera
E ta bisa ku ainda e tin su partidarionan bou di kòntròl. “E protesta por ta desente i pasífiko. Pero mi sa ku nan ta dispuesto pa trat’é na un otro manera. Mi ta un lider, pero si e kos no logra no t’ami akí ta bisa: keda sinta i muri numa.”
Ounke Finies ta indiká ku e no ta aprobá e ekspreshonnan radikal, por ripará su amargura tòg. “Nos ta den un guera. Esaki ta sosodé ora bo kita un hende su derechinan. A kita nos poder. Nos ta pèrdiendo tur kos. Mi no ta aprobá si e lucha tuma un direkshon militante. Di otro banda kiko bo ta hasi den un guera; laga nan matá bo òf bo ta bringa bèk? Mester mira e seriedat di e situashon.”
Outor Belkis Osepa