Diseño di e Hard Rock Hotel cu Southwest Horeca Development kier a construi.
ORANJESTAD — Ministerio Publico lo bay dicidi pronto si nan lo bay persigui entre otro minister di Turismo Otmar Oduber, minister di Infrastructura Benny Sevinger, directiva di Aruba Investment Bank y prome minister Mike Eman penalmente, a base di e keho di corupcion cu Jan de Ruijter a entrega recientemente concerniendo construccion di un Hard Rock Hotel. Esaki vocero di OM Ann Angela ta declara na Red Karibense.
“Awe meneer De Ruijter tabata na Ministerio Publico riba invitacion di fiscal mayor y fiscal Schmidz. Tabata pa un combersacion informativo pa e splica su posicion manera poni den e carta cu el a manda pa fiscal mayor”, asina Angela ta duna di conoce, bisando cu e combersacion a bay bon.
“Den su carta na fiscal mayor, De Ruijter a pidi pa un investigacion penal, of miho bisa pa nos persigui minister Oduber. E combersacion informativo di awe tabata pues pa Ministerio Publico yega na un decision final si lo persigui of no.” Segun Angela e decision pa persigui Oduber of no lo bay cay mas liher posibel. “E ta un decision cu mester wordo haci na un forma cauteloso y bon considera, pues lo tuma e tempo cu ta necesario y prudente. Asina cu un decision cay, nos lo informa”, asina e vocero ta informa.
Detayenan
Jan de Ruijter di su banda ta confirma cu e combersacion a bay den bon ambiente, bisando cu Ministerio Publico a pidie pa aclarea cierto detayenan for di su carta por escrito. “Unabes nan haya esakinan, nan por tuma un decision. Mi ta bay percura pa mayan mes nan haya nan”, asina De Ruijter ta duna di conoce. Ki detayenan exactamente for di e carta cu ela manda pa Ministerio Publico e tin cu aclarea ainda, De Ruijter no kier bisa. Fiscal mayor, apesar di ta nobo den su funcion, lo a lesa e carta bon y mustra interes genuino den e caso, segun De Ruijter. E ta bisa cu a dura hopi largo caba pa yega te aki y cu e ta combenci cu tur e acusadonan den e keho lo wordo persigui.
‘Adicto’
A tuma contacto tambe cu minister Oduber, pero e mandatario no kier a duna niun reaccion, otro cu mester puntra Ministerio Publico pa loke ta e combersacion cu nan tabatin cu De Ruijter. “Ami ta considera señor De Ruyter un loco, un adicto cu a bin cu un gran cantidad di acusacionnan falso cu no tin ni pia, ni cabes.”
Fraude
December aña pasa De Ruijter a entrega un keho serca Ministerio Publico pa corupcion, fraude y testimonio falso por escrito contra minister Oduber y tambe entre otro minister Benny Sevinger di Infrastructura y prome minister Mike Eman. Esaki despues cu minister Oduber a perde su caso pa defamacion contra De Ruijter concerniendo e mesun acusacionnan. Segun De Ruijter, minister Oduber lo a comete fraude pa asina percura cu Southwest Horeca Development, un compania di familiarnan di ex-minister di Finanzas y lider di AVP Tico Croes, haya e gunning pa construi un Hard Rock Hotel na unda te ainda tin para e ruina di Bushiri Hotel. E minister lo a wordo acesora den esaki pa varios persona incluyendo prome minister Mike Eman y directiva di Aruba Investment Bank.
Autor Ariën Rasmijn