Periodistanan ta pensa riba un kódigo étiko pa nan profeshon – potrèt: Renske Pin
WILLEMSTAD – E promé masterclass di ‘periodismo i integridat’ di e departamento kurasoleño di e Agensia di Nashonnan Uní pa Edukashon, siensia i Kultura (UNESCO) a terminá.
Binti partisipante a inventarisá kua tópikonan ta importante pa inkorporá den un kódigo étiko pa periodista kurasoleño.
Na Kòrsou no tabatin un kódigo étiko ku hopi sosten mas pa periodista usa, ni tampoko un Konseho pa Periodismo ku por vigilá un kódigo asina i ku ta tene e grupo profeshonal responsabel pa e reglanan di nan fishi. Tin medionan di komunikashon na Kòrsou ku ta traha ku nan propio statuto di redakshon. Pero si e kalidat di esaki ta kuadra ku e nesesidat moderno i si ta kumpli ku e propio kódigo, esei hopi be ta e pregunta. E resultado ta ku e konsumidó di notisia no ta konfia kompletamente e tipo di notisia ku sa presentá n’e.
Ta pidi edukashon
Un investigashon di Renske Pin, Susan van Velzen i Irwin Kortsjens di UNESCO ta mustra ku tin hopi nesesidat di edukashon di periodista, tambe tokante e parti étiko di nan trabou. UNESKO i Renske Pin a kuminsá ku un programa di desaroyo ku ta konsistí di sinku masterclass. E promé un tabata tokante periodismo i integridat.
Shayènne Griejaloe a haña hopi komprenshon nobo pa medio di e diskushonnan den e promé masterclass. “Nos a papia tokante hopi aspekto di integridat. Bo por aseptá regalo komo periodista? Komo periodista bo por bai un fiesta di un kompania sin ku nan duda bo konfiabilidat?
E puntonan ku ta bini bèk den e kodigo di konsepto, ta relashoná na e derecho di privasia di e siudadano kurasoleño, e importansha di kubertura ophetivo i honesto i prevenshon di difamashon, kalumnia i provokashon.
Base di sosten
Segun dosente Nelly Schotborgh ta espesialmente e base di sosten ta importante pa un kódigo. E periodistanan mes mester ke profeshonalisá i hasi nan trabou na un manera responsabel. Esei ke men por ehèmpel ku un periodista no ta tuma trabou di otro hende ofer sin menta e fuente, òf ku no ta revelá informashon ku por kousa sufrimentu èkstra serka víktimanan i famia, amigu i konosí di un víktima defuntu di un aksidente òf un krimen. E konsumidó di notisia mes tambe tin un tarea: e mester ta konsiente di e efektonan dañino di redu i kubertura sensashonal.
Jose de Bruin di Antilliaans Dagblad no tabata na e masterclass. E ta haña ku ta piká ku e no por a inskribí, pero simpelmente e no tabatin tempu. “Mi ta muchu okupá. Mi ta enkargá ku un programa di radio riba djasabra i mi no a mira un posibilidat pa sigui e masterclass. Mi ta haña masha bon ku ta organisá algu asina, ounke mi no ta haña ku medionan di komunikashon na Kòrsou ta masha malu. Naturalmente semper por mihó. Bon mirá tur periodista na Kòrsou mester partisipá na e masterclassnan aki. Dia ku nan tin un vershon definitivo di e kódigo di étika gustosamente lo mi ke les’é.
Vishon i idea
Schotborg ta haña ku ta importante pa otro periodista na Kòrsou tambe haña e oportunidat pa duna nan vishon i ideanan tokante e tópiko aki. Por konsiderá e konsepto di e kódigo di e masterclass komo un promé inisiativa di esaki. E ta haña eksaktamente loke e ke: un grupito di futuro periodista hóben huntu ku algun periodista ku eksperiensha ta uni forsa pa lucha pa e kódigo i pa den futuro asta yega na un asosiashon di profeshon òf un Konseho di Periodismo.
Pin: “Mi ta masha kontentu ku e diskushon ku a estayá despues di e promé masterclass, pasobra ta di esei ta trata. Ku nos ta pone periodistanan pensa tokante loke por i loke no por den periodismo.”
Outor Sofie Custers