Director tékniko di aqualectra Darick Jones
WILLEMSTAD – Después di simannan tumultuoso unda negosashonan intenso entre gerensia i sindikatonan di Aqualectra a tuma lugá, ta parse ku porfin sierto di e partidonan a yega na un resolushon. Representantenan di STK i STKO a reuní ku nan miembronan djaweps último, pa presentá nan e akuerdo di prinsipio ku a keda forma ku gerensia di Aqualectra.
Durante e negosashonan, sindikato STK i STKO a hasi un par di konseshón pa asina por a yega na un akuerdo ku gerensha di Aqualectra. Pa yega na e desishon akí, STK i STKO a konsiderá tur ángulo di e proposishon i a tene kuenta ku e realidat ku e kompanía di utilidat ta aden. “E kompromisonan tabata minimal i ta trata spesifíkamente di un redukshon den e bashi premie, prima di vakashon i e skala máksimo ku un trahado por yega”, presidente di STK, Edwin ‘Chika’ Fransiska a splika. Segun Fransiska, e reunion a bai bon, unda miembronan a haña oportunidat pa hasi pregunta i despues a vota riba e akuerdo i a aseptá esaki.
STK i STKO a informá mediadó Randolph ‘Dois’ Gijsbertha ku e sindikatonan a aseptá e akuerdo di prinsipio. “Awó ta warda Aqualectra pa determiná e fecha di pago di e bashi premi pa e trahadónan”, Fransiska a indiká. Un faktor prinsipal tabata e introdukshon di trahadonan den seguro básiko, kual lo baha e gastunan di personal di 120 mion pa 100 mion florín, según Aqualectra.
Ta konosí ku Aqualectra, kende ta den un situashon finansiero delikado, mester tuma medidanan drástiko pa sana nan situashon finansiero, mirando ku e situashon di e kompanía di utilidat ta bira día pa día más prekario. “Después di añanan ku e kompanía ta sufri peèrdida, trahadónan mester komprondé ku pa salvaguardiá e kompanía i nan futuro, mester entregá sierto luhonan”, director tékniko Darick Jonis a splika. Aqualectra ta den un proseso di kambio, unda ta kambiando e sistema burokrátiko pa unu kompletamente automatisá, unda e kompanía ta introdusí teknologia más moderno i efisiente, Jonis a kontinúa.
Na promé instante, sindikatonan a ekspresá nan deskonfiansa den e sifranan ku gerensia di Aqualectra a presentá, ya ku no a ouditá e sifranan. “gerensia ta bezig ainda ku e sifranan anual, i mi a duna nan tur informashon riba un manera transparente”, Jonis a splika. Otro punto di kontienda ta ku ainda e CAO o konbenio laboral no a keda aprobá, algu ku Jonis ta tira den skochi di gobièrnu pa kaba atende.
E delaster sindikato ku ainda mester yega na un akuerdo ku gerensia di Aqualectra ta SEU, kende a ninga di hasi más kompromiso pa su miembronan i ta di opinión ku e trahadó no mester bira víktima di e mal maneho di gerensia di Aqualectra.
Den medionan di komunikashon, rumornan di sabotahe di e planta a keda alega, pa oumentápreshon riba gerensia di Aqualectra, algu ku STK ni STKO sigur no ta sostené i ta distansiá nan mes di esaki. “Nos sigur no a instruí nos miembronan pa aktua di tal manera i kisas bo mester buska e splikashon serka e otro sindikato”, Sr. Fransiska a sugerí.
Outor: Deya Mensche