Marshe di Trabou pa hobennan di Bandabou – potrèt: José Manuel Dias
WILLEMSTAD – Hobennan di Bandabou a mustra hopi interés pa traha na Dòk durante e Marshe di Trabou ku a tuma lugá djasabra último na Sentro di Bario Tera Korá. “Nos a bin ku 150 formulario di inskripshon i pa banda di mitar di 11 ya tur a kaba”. Asina Jurgen Rodrigues, direktor di Rekurso Humano di Curaçaose Dok Maatschappij (CDM) a deklará.
E Marshe di Trabou di Tera Korá tabata un inisiativa di Jules Cathalina, kende den su labor diario komo agente polisial di Barber a ripará ku pa motibu di falta di trabou den e area di Bandabou hopi hoben entre 18 pa 24 aña di edat ta kai den gara di kriminalidat. “Ounke ku kreamentu di puesto di trabou no ta un tarea di polis, Kuerpo Polisial a sostené e inisiativa aki i a yuda organisá e marshe di trabou huntu ku Curaçaose Dok Maatschappij, Refineria Isla i Feffik”.
Un reportahe di José Manuel Dias
Banda di e kompanianan grandi manera CDM i Refineria Isla e Marshe di Trabou di Tera Korá a konta ku partisipashon di e siguiente kontratistanan: Bak en Hous, Petro Industrial, MITS Curaçao NV, Cooltech Airconditioning and Appliances, ARIMCO Industrial Services BV i Curacao Industrial Services.
Registro di labor
Ministerio di Desaroyo Sosial, Labor i Bienestar (SOAW) atrabes di su sektor di labor tambe tabata presente ku un stènt di informashon. Akinan e hobennan por a haña informashon tokante e diferente vakaturanan i alabes inskribi nan mes den e registro di hendenan ku ta buskando trabou.
Otro barionan
Apesar ku e Marshe di Trabou aki tabata dirigi prinsipalmente riba e hobennan di e area di Bandabou ku ta buskando trabou, tabatin tòg basta hoben ku a bini for di diferente bario di Bandariba. Esaki ta duna un indikashon hopi kla di e kantidat di hobennan ku tin aktualmente ta buskando un trabou.
Outor José Manuel Dias