Drajiza Martina (40) kasá di Jesus Sandoval i su yu muhé Audri (5) | Potrèt: Dick Drayer
WILLEMSTAD – Djaluna meinta 29 di sèptember 2014, shet’or di meinta, Jesus Sandoval ta sunchi su dos yunan Audri di sinku aña di edat i Jaarold di diesdos aña na kada band’é kara. E ta kana baha e trapi di su stupi di kas, e ta bira hisa man yama su kasá Drajiza Martinez ayó un biaha mas. Kaba e ta bira skina pa kue kaminda pa parada di bùs na Colon. E ta na kaminda pa Sambil i e lo no bolbe bèk na kas nunka mas.
Ni tres ora despues Jesus ta kai abou di un haltura di sinku meter. Pa motibunan deskonosí, na e momentu ei e ta pèrdè ekilibrio durante instalashon di un èrko. E ta kai riba su lomba i e ta haña un sla masha duru na kabes. Sanger ta basha di su nanishi i oreanan.
“Mi a mira e aksidente sosodé”, E. E. (42) ta bisa. Mi a yega djis despues mientras ku e tabata drumí abou ainda. Mi por a papia kuné, e tabatin hopi doló di lomba.” Elvis i Jesus ta bon amigu i tur dos ta bini di Colombia : “Jesus tin diestres aña kaba aki, t’ami a manda busk’é bini Sambil pasobra e no tabatin trabou.”
Sin seguridat
Tres dia promé ku e aksidente e matutino Extra ta skibi ku e kondishonnan di trabou riba e tereno di Sambil ta sumamente insigur. Mayoria di e trahadónan den konstrukshon ta traha sin hèlm i sapatu di seguridat i esnan ku ta traha den laira mester hasi esaki sin stèlashi. Elvis a mira kon diferente biaha Jesus tabata kaba riba e pipanan di trese airu fresku ku ta kologá bou di e dak. Pa instalashon di e èrkonan no a traha stèlashi.
Personal di ambulans ta papia ku Jesus Sandoval (42). Dia 7 di òktober e ta fayesé na hòspital
Jesus Sandoval ta traha na Innovations Systems & Services. Un di e desenanan di kompania chiki venesolano ku a lanta espesialmente pa konstrukshon di Sambil. Nan ta ofresé nan servisionan komo supkontratista seka Sambil, ma nan no tin kliente niun otro kaminda. Tin hende na e sitio di konstrukshon ku ta bisa ku e kompanianan aki ta disparse promé ku e trabou kaba, hopi be sin inskribí e trahadónan na SVB.
Drajiza ta tuma un abogado ora resultá ku e doño di trabou no ta atendé ku e desgrasia. E ora ei ta bin sali ku Innovation no a mèldu e aksidente serka Inspekshon di Labor. Esaki sa soisodé mas be Norman Mattheeuw, hefe suplente na Inspekshon di Labor i Seguridat ta bisa.
Eskases di personal
E servisio ta kai bou di ministerio di Desaroyo Sosial, Labor i Bienestar i ta lucha ku un eskases króniko di personal. “Anualmente nos tin mas o ménos binti aksidente serio na trabou. E aksidentenan mas opvio si ta yega e ofisina di Inspekshon di Labor mésora. Manera e desaster di vürwèrk dia 15 di desèmber 2013 i e eksploshon na fábrika di ásfalt. Pero ku dos inspektor so bo tin bo mannan yen” E falta di inspektor ta nifiká ku Inspekshon di Labor mas be ta dependé di denunsio (anónimo) i kasi no ta investigá segun nan propio opservashonnan.
Segun e abogado di Drajiza Inspekshon di Seguridat na yanüari ainda no a kuminsá ku e investigashon. Mattheeuw no por konfirmá esaki, pasonra Inspekshon no ta duna informashon tokante investigashonnan ku ta kore. E ta rekonosé si ku seguridat na trabou, sigur na sitionan di konstrukshon, ta laga hopi di deseá. “E responsabilidat p’esaki na promé lugá ta serka e doño di trabou. Ma komo trahado tambe bo mester pèrkurá pa bo propio seguridat i denunsiá loke no ta bon.
Segun E. esei ta ko’i kèns. “Nos no ta reklamá tokante seguridat na trabou. Promé ku bo sa nan a kita bo fo’i trabou. Na mi lugá nan por haña dies otro.””
Outor: Dick Drayer