Reunion informativo di ABVO tokante eliminashon di areglo  di VUT | Potrét Jose Manuel Dias

Reunion informativo di ABVO tokante eliminashon di areglo di VUT | Potrét Jose Manuel Dias

WILLEMSTAD – “E ta un medida deskriminatorio i inhumano”. Asina un empleado públiko ta deskribí e desishon di gobièrnu pa eliminá e areglo di ‘Vervroegde Uitdiensttreding’ (VUT) entrante promé di yanüari 2016. Aktualmente tin un total di 900 empleado públiko ku lo por hasi uso di e areglo di VUT.

Esaki ta un di e reakshonnan ku a bini dilanti djaweps último durante un anochi di informashon organisá pa sindikato ABVO tokante kambionan den e lei di VUT. E reunion tabata hopi bon bishitá i a registrá presensia di un total di 180 persona.

Un reportahe di José Manuel Dias

E parti di dunamentu di informashon tabata na enkargo di Royston Sling di Fondo di Penshun di Kòrsou (APC), Tony Hernandez den representashon di gobièrnu, Maruja Kopra di Servisio di Impuesto i presidente di ABVO, Wendy Calmes.

E areglo eksistente di VUT ta hasi posibel ku empleadonan públiko ku kumpli 55 aña di edat i tin por lo menos binti aña den servisio, por opta pa stòp di traha promé ku yega e edat di penshun. Sinembargo pa motibu di kambionan den e lei di VUT despues di promé di yanüari 2016 esaki no ta posibel mas.

Kambio di lei

Un di e kambionan ku a hasi den e lei di VUT ta aktivashon i ehekushon di un artíkulo den e ‘Landsverordening verhoging leeftijdsgrens 1996’ ku tabata inaktivo pa motibu di interpretashon di un veredikto di wes. E artíkulo aki ta bisa ku únikamente esnan ku a nase promé ku un di yanüari 1949 tin e derecho pa hasi uso di e areglo di VUT. Ku aplikashon di e artíkulo aki práktikamente ta eliminá e aktual areglo di VUT.

Autor: Jose Manuel Dias