Minister Plasterk i promé minister Gumbs (d) – potrèt di archivo: Today/Hilbert Haar
DEN HAAG – Konseho di Minister di Reino ke pa mas lihé posibel instalá un komishon independiente ku ta investigá e integridat di mandatarionan na Sint Maarten. Gobièrnu di Sint Maarten lo haña un di tres instrukshon si e no koperá.
Minister Plasterk ta haña ku gobièrnu di Sint Maarten tin muchu poko disposishon, forsa laboral i plaka pa trata e problemasia. “Te awor e poder outosufisiente di un komunidat chikí manera Sint Maarten no tabata basta pa trata e problemasia aki profundamente”, asina e minister di Asuntunan Interior i Relashonnan den Reino ta bisa.
Plasterk ta spera ku e gobièrnu di Marcel Gumbs ta bai di akuerdo ku e komishon. Sino lo imponé e komishon ku un instrukshon. E komishon ku mester lanta lo por pasa loke el a haña sa pa Ministerio Públiko, si ta trata di echonan kastigabel.
Gobièrnu di Sint Maarten lo haña e medida planeá den un plan di konsepto i e por reakshoná. Dia 6 di mart Konseho di Minister di Reino lo tuma un desishon tokante e medida.
Anteriormente un komishon di investigashon di gobernador a reuní i klasifiká e abusunan. Korupshon, mal uso di poder i bruamentu di interes ta sistemátiko, e rapòrt ta konkluí. Plasterk ta yama e situashon riba e isla ‘inaseptabel’.
Sint Maartenhuis na Hulanda no tabata alkansabel pa komentario.
Outor: Pieter Hofmann