Usuarionan ta eksigi bahada di tarifa di bus | Potrét José Manuel Dias
WILLEMSTAD – “Aworaki no tin ningun inisiativa ta kanando pa ahustá e tarifanan di bùs”. Esaki tabata e kontesta ku minister Earl Balborda enkargá ku Transporte Públiko a duna, riba e pregunta ku si ta bai baha tarifanan di bùsnan chiki i konvoi.
Entrante dia tres di febrüari próksimo preis di diesel ku ta e kombustibel ku bùsnan ta huza, lo bolbe konosé un bahada, e biaha aki di 31 sèn pa liter. Esaki ta e bahada di mas drástiko desde ku e preisnan di kombustibel a kuminsá baha, komo konsekuensia di e kaida di preis di krudo. Usuarionan di transporte públiko ta di opinion ku nan ta pagando di mas i ta eksigi un redukshon den e tarifanan di bùs chiki i konvoi.
Un reportahe di José Manuel Dias
E preis di diesel ta baha di 1.607 sèn pa liter bai te na 1.291 sèn pa liter mientras ku preis gasolin tambe ta baha ku 22 sèn pa liter. For di dia tres di novèmber di aña pasá te ku e mas resiente adaptashon di preis di kombustibel ku ta drenta na vigor dia tres di febrüari próksimo, preis di diesel na Kòrsou a baha ku un total di 55 sèn pa liter. E bahada kontinuo aki sinembargo no a bai kompañá pa adaptashon di tarifanan di transporte públiko.
Outor José Manuel Dias