Si ta pa OM, Kuwas lo sinta su kastigu den prizòn SDKK – potrèt: John van der Tol

Si ta pa OM, Kuwas lo sinta su kastigu den prizòn SDKK – potrèt: John van der Tol

WILLEMSTAD – Si ta pa Ministerio Públiko (OM) Elvis ‘Monster’ Kuwas lo mester sinta su kastigu di bida largu na Kòrsou. E pronunsiashon aki di abogado-general Ton van der Schans por a konta ku gritu di legria suprimí serka e famianan di e polítiko asesina Helmin Wiels.

Ku esaki a sera e último dia di e apelashon den e kaso Magnus. Wes lo duna su veredikto dia 20 di febrüari. E pregunta di mas importante ku mester kontestá ta si e kastigu di bida largu ta hustu. Si e kontesta ta sí, e ora ei e siguiente pregunta ta: unda mester sinta e kastigu antó. Segun abogado general, Kuwas ta inskribí na Kòrsou, a kometé e krimen na Kòrsou i a sentensié na Kòrsou.

No ta bèrdat
Lo no tin un motibu pa lag’é sinta su kastigu na Hulanda. Dia ku na mart di aña pasá a transportá Kuwas pa Hulanda, segun Van der Schans a hasi esaki ‘despues ku a sali sufisientemente ku su deklarashonnan tabata konforme bèrdat’. “Awor ta manera e loke bo ta ninga no ta konforme bèrdat”, abogado-general a bisa.

Kuwas su abogado Olga Kostrzewski riba e último dia di e apelashon a reakshoná iritá: “Mi kliente tabata shen porshento konvensé ku e lo por sinta su kastigu na Hulanda. Awor ta bisa ku e mester sinta su kastigu na Kòrsou mes. Esaki ta prueba atrobe ku a manipulá e kliente sin tin nodi.” E abogado a papia di ‘mal entendementu horibel i pa malu’ di parti di OM.

 
Bolle i Pretu
Kuwas a sera e seshon ku e ripitishon ku e no sa nada di e asesinato i ku esnan ku si sa ta morto. E ke men Raul Martinus, mihó konosí komo ‘Bolle’ i Luigi Florentina, mihó konosí komo ‘Pretu’. Na mei di aña 2013 a haña Bolle morta na San Pedro, a asesin’é. Pretu lo a mata su kurpa den un sèl na Barber.

 
E tres wesnan Ter Berg, Verheijen i Lewin dia 20 di febrüari atrobe lo pronunsiá sentensia riba Dangelo Damascus i Carlos Pieter, ku Korte di Promé Instansha a apsolvé di komplisidat na e asesinato di Wiels riba 5 di mei 2013. Ministerio Públiko den e apelashon atrobe a eksigí sinku aña pa Pieter i binti aña pa Damascus. Den e eksigensha penal a inkluí otro delito di kual ta sospechá nan.

 
Maximus
Ainda no ta konosí ki dia lo trata e kaso Maximus. Esaki ta trata di e outornan intelektual tras di e asesinato di Wiels. Den e kaso aki OM a indiká Burney ‘Nini’ Fonseca, Robbie Dos Santos, George Jamaloodin i Carlos Monk komo sospechoso.

Outor Anneke Polak