Minister Dennis Richardson i promé minister Marcel Gumbs (d) durante di e konferensha di prensa | potrèt: Today/Hilbert Haar
PHILIPSBURG – Promé minister Marcel Gumbs i minister di Hustisia Dennis Richardson ku konsternashon a reakshoná riba e desishon di minister Ronald Plasterk di Relashonnan den Reino pa via un prosedura di artíkulo 51 fòrsa lantamentu di un Kámara di Integridat segun modelo hulandes.
Mientras ku Plasterk a bisa ku ainda e ta buskando akuerdo, Richardson djadumingu riba e konferensha di prensa a splika ku esaki ta imposibel: “mientras tantu ku e Medida General di Gobernashon di Reino ei ta riba mesa no tin espasio pa konsenso.”
E gabinete resien formá a hasi masha purá ku e proyekto di e legislashon ku mester sostené instalashon di un Kámara di Integridat. “Nos a bisa Asuntunan Hurídiko pa laga tur otro kos para i traha e trabou aki”, segun Gumbs. E konsepto di e Landsverordening ta na Konseho di Asesoramentu pa komentario. Richardson tabata sostené e idea ku Konseho di Minister di Reino no por solisitá artíkulo 51 di statüt mientras ku Sint Maarten ta trahando riba un Kámara di Integridat.
Minister Richardson ta akusá Plasterk di ta kambia e echonan, entre otro ku e remarke ku ta parlamento tin último palabra tokante e Kámara di Integridat. Den realidat despues ku aseptá e Landsverordening, parlamento su trabou a kaba.
Gumbs i Richardson ta refutá e ponensha ku e Kámara di Integridat lo kai bou di influensha polítiko. Segun e konsepto di e Landsverordening ta un Konseho di Supervishon ta nombra e parlamentarionan. E konseho ta konsistí di presidente di e korte komun di Hustisia – Evert Jan van der Poel – e visepresidente di e Konseho di Asesoramentu – Mavis Brooks-Salmon- i un di tres kandidato ku lo nombra segun desishon real riba nominashon di Konseho di Minister di Reino despues di deliberashon ku konseho di minister na Philipsburg.
Konsehonan obligatorio
E Kámara di Integridat lo duna konsehonan obligatorio na konseho di minister i ta ku motivashon por eskrito so por desviá di esakinan.
Outor Hilbert Haar