Partido nobo MPB | potrèt: Belkis Osepa
KRALENDIJK – Tabatin bon ambiente na Wilhelminaplein na Playa i riba bòrdèshi di e edifisio Pasanggrahan, kaminda e ofisina supremo elektoral di Boneiru ta keda te dia 18 di mart. Meimei di turista di krusero tabatin grupo di polítiko di diferente partido ta kana bai Pasaggrahan pa entregá nan lista di kandidato.
Ounke e partidonan tin simannan ta hiba kampaña kaba, awor sí e lucha a estayá. Por a ripará e diferenshanan entre e partidonan. Tabatin un similaridat tambe: hende ta pará sentral.
Shete partido a entregá nan lista di kandidato pa partisipá na e elekshonnan lokal dia 18 di mart. Kuater partido nobo ta kompetí pa e nuebe asientonan di konseho insular. E partidonan nobo ta Aliansa Kristian Boneriano, Movimentu di Pueblo Boneriano, 1 Tim Magno i Lista Soleana. Ademas e partidonan bieu Partido Demokrátiko (DP), Union Patriótiko Boneriano (UPB) i Partido Pro Hustisia & Union (PHU) t’ei atrobe, meskos ku na 2011.
Espesialmente e partidonanmas grandi a bini ku mas siguidó i a parti mas bandera pa waya i mas desena di T-shirt. Tin diferensha den ánimo i ambiente tambe. Tin siguidó ku ta kanta e jingle ku hopi entusiasmo. Otro partido ta kana modestamente bai e presidente di e ofisina supremo elektoral Edison Rijna pa entregá e lista di kandidato.
Simpatisante hóben di e partido nobo 1 Tim Magno | potrèt: Belkis Osepa
Tópiko
E kabesantenan di lista di e shete partidonan ta konta riba kiko na ta pone énfasis durante e kampaña di elekshon. Algun tópiko ta pasa: e laso ku Hulanda, outodeterminashon, referèndem, vishon pa futuro di Boneiru, struktura estatal, koperashon i liderasgo. Un tópiko tabata haña mas atenshon: hende mester para sentral. Asina so hende (e bonerianu) por skohe pa futuro di Boneiru.
Outor Belkis Osepa