Panel solar ta popular na Korsów | Potrèt: Jean Mentens

Panel solar ta popular na Korsów | Potrèt: Jean Mentens

WILLEMSTAD – Un di e kuater bendedónan di panel solar ya a pèrdè e kaso ku nan a entamá kontra gobièrnu di Kòrsou, pa protestá e oumento di tarifa ku Aqualectra a indiká di bai subí pa 16 florín pa luna. Ku e pèrdida di e kaso, “pueblo ta keda kastigá pa Aqualectra su mal maneho”, según What’s App Energy. E simannan benidero sobrá bendedó di panel solar lo tende hues su veredikto riba e asuntu akí.

Na 2012, gobièrnu a promové energía alternativa agresivamente bou komersiantenan di nos komunidat, unda panel solar a keda menshona komo un alternativa pa konsumidornan privá i komersial, segun What’s App Energy, un di e kompanianan ku a demandá gobièrnu. “Invershonnan grandi a keda hasi den e último añanan, i e ahuste di tarifa di e manera akí lo alargá e periodo ku e klientenan lo rekuperá nan invershon”, abogado Wiek Herben a splika.

Direktor general di Aqualectra Darick Jonis ta atmití ku e gerensia anterior a hasi un eror den su merkadeo original ora a promové uso di energía solar, kual a trese konfushon bou di e konsumidó i komersiante. Jonis ta sigui splika ku e kosto di produkshon di Aqualectra a baha signifikantemente, i ta aproksimadamente 30 pa 32 sèn pa KW. Segun Jonis, e produktor ta bende e energía bek ku Aqualectra pa hopi mas karu ku e kompanía di utilidat mes por produsí. Aktualmente Aqualectra ta kumpra koriente bèk serka e produktor privá pa 40 sèn pa KW. “Lei ta stipulá ku tur aña tin ahuste a base di e kalkulashonan nobo di e tarifa”, e direktor a añadí.

A tilda Aqualectra di a tuma e posishon aktual, pasombra e no tin e kapasidat pa tuma e elektrisidat ekseso di e konsumidor i ku e no por aktua frívolamente ku e tarifa. Darick Jonis na su turno ta enfatisá ku no tin problema ku grid, i ta di opinión ku e 65.000 kliente ku Aqualectra ta suministrá koriente na dje, no por keda paga pa e diferensia pa un grupo di 400 produktor di energía solar.

Según propietario di panel solar Pepijn B., Aqualectra no tabata proaktivo ora mester a hasi su mes invershonnan den energía solar, i konsekuentemente ainda ta dependiente di kombustibel fòsil. “Aqualectra tin miedu di panel solar paso nan ta teme ku esaki ta krese demasiado i nan lo perde nan pan”, el a kontinúa. E bendedónan di panel solar ta teme ku e kambionan di tarifa lo demotivá e konsumidó pa konsiderá un invershon den panel solar.

Segun What’s App Energy, e siguiente paso ta pa negoshá ku Aqualectra i purba baha e tarifa. “E ahuste mester tuma lugá menos abrupto”, segun e bendedónan di panel solar. Mester tin algun garantía sino e kambionan lo tin konsekensianan negativo pa e konsumidó priva ku ya a invertí den panel solar, el a konkluí.

Segun Jonis, Aqualectra ke sigui promove energía alternativa i pa 2020 ke yega na 100 mégawat di produkshon propio. Pepijn B. no ta konvensí ku gobièrnu di Kòrsou realmente ta komprometé na kresementu di energía solar. “Gobiernu ta asistí na e konferensia di Renewable Energy ku visepresidente merikano Joe Biden, pero ku e medidanan akí, ta señal miksto so nan ta manda na komunidat”, el a konkluí. “Si sigui asina mi ta konsidera invertí den e sistema di accu i bai kompletamente fo’i e grid”, ela finalisa

Outor: Deya Mensche