Marga Domingo, abogado di sospechoso Pacheco den kombersashon ku polis | potrèt Belkis Osepa
KRALENDIJK – E kaso di asesinato dòbel Country Garden ta kompliká pa Ministerio Públiko di BES (OM BES) í tambe pa korte. Riba e promé dia di e trato di kontenido tabatin deklarashon kontradiktorio i inklaridat tokante e involukrashon di e sospechosonan. Pa sigur tres sospechoso OM ta bai pidi apsolushon.
A wanta e kaso penal di e sospechoso mayó Rayan Frans te 3 di yüni pasobra e abogado ainda no konosé e fail bon. Dia 27 di febrüari tin e veredikto pa e otro seis sospechosonan.
Belkis Osepa ta papia ku bosero di OM Norman Serphos
E investigashonnan di polis, marechaussee i OM a tuma un aña. E kaso di asesinato dòbel tabata un lucha agotador enorme i a pidi hopi di e kapasidat di polis na Boneiru, ku tabata abou kaba.
Den anochi di 23 pa 24 di yanüari a haña e kurpanan sin bida di Francis Lourens i Thursten Scholts. Un kurpa tabata den un outo kimá na e kaminda pa bai Rincon i e otro kurpa tabata den un dam na Kralendijk. Durante di e seshon den korte a bin sali ku ta droga tabata e motibu, huntu ku vengansa entre e sospechoso mayó i un di e víktimanan.
Sorpresa
Wes Irma Lips diferente be a sera su frenta durante di e seshon. No Lips so, sino e fiskalnan Henry Hambeukers i Rob Rammeloo tambe a ekspresá nan sorpresa ora despues di un seri di pregunta ainda a sobra partinan ku no a kontestá. Tras di Lips su lomba tin un kashi haltu ku desena di map ku ta kontené informashon di e asesinato dòbel. Esakinan tambe ta yen di deklarashon kontradiktorio, inkompleto i evasivo. A pone asesinato cq. homisidio òf komplisidat na esaki na kargo di e tres sospechosonan ku a parse dilante wes djamars. Tambe ta reprochá nan di poseshon ilegal di un arma di kandela i un shotgun.
‘Señor Martijn, bo a konta asina tantu diferente bèrdat”, Lips ta bisa poko síniko. “Ta kon e kos ta awor?” A interogá sospechoso Lisandro Martijn un total di dieskuater be i kada be el a duna un otro deklarashon. Martijn a entregá su mes, mas o ménos bou di preshon di un deskonosido ku a menas’é i su famia. Lips a interogá e promé tres sospechosonan intensivamente. OM tambe a trata ainda di saka berdat.
Kòntròl durante trato Country Garden | potrèt Belkis Osepa
Prueba
E dos sospechosonan Cueto Pacheco i Wanga kontinuamente ta kontradesí otro den sala di korte. Norman Serphos, bosero di OM, ta intimá ku OM ta bai pidi apsolushon pa un kantidat di sospechoso. OM no por prueba konklusivamente ku e sospechosonan a kometé e echonan ku a pone na nan kargo.
E kaso penal di sospechoso mayó Ryan Frans ta bini na yüni. Abogado Roy Gonet ta indiká ku e no konosé e fail di su kliente bon ainda i ku e mester di mas tempu pa papia ku Frans ku kontra su boluntat ta será na Hulanda. OM a remarká durante e seshon ku Gonet no a hasi sufisiente uso di e fasilidatnan ku a ofres’é pa komuniká ku su kliente. Ku palabra na ora Frans a kontestá: “papia na telefon no ta konfiabel. Niun abogado no ta papia ku nan kliente na telefon.” OM a ofresé tambe e posibilidat pa biaha pa Hulanda mas be. Den korte Frans a ninga investigashon sikiátriko i sikológiko i ta perseverá den su inosensia.
Korte a reservá kuater dia pa e kaso aki. Meskos ku na e seshonnan pro forma i preparatorio tabatin medidanan èkstra di seguridat. E trato di e kaso di e seis sospechosonan ta tuma un dia i mei. Awe tardi ta sigui e rekisitorio di OM i e eksigenshanan di kastigu kontra e sospechosonan. Segun Serphos e fiskalnan Hambeukers i Rammeloo ta bai splika kon segun nan e pùzel ta hinká den otro.
Outor Belkis Osepa