Pa motibu di medidanan di seguridat severo abogado Ernst Wesselius di sospechoso C. Wanga no por a sigui kore mesora | Potrèt: Belkis Osepa
KRALENDIJK – Ministerio Públiko di BES a eksihí 24 aña pa dos sospechoso den e kaso di asesinato dòbel Country Garden. Kuater sospechoso probablemente ta sali liber awe nochi mes, riba e di dos dia di e trato di e kaso di asesinato dòbel Country Garden. OM mes a eksihí apsolushon pa nan.
“Pa motibu di ousensia di sospechonan serio den e kasonan kontra Janga, Winklaar, Martijn i Alcantara-Gil, ta anulá e detenshon provishonal”, fiskal Rob Rammeloo a deklará na fin di e rekisitorio. OM no tabatin prueba pa konvensé ku e kuaternan tabata envolví. Tin prueba sigur si kontra Gerson Cueto Pacheco, Carlos Wanga i Rayan Frans. Ta wanta e kaso di Frans te na yüni.
Krimen
E fiskalnan Henry Hambeukers i Rammeloo a tuma tres ora i mei pa splika den nan rekisitorio kon e kaso di asesinato dòbel ta sinta den otro. Hambeukers a konta den korte ku e krímen chokante tabata tin un impakto enorme riba e isla. “E asesinato dòbel aki kaminda por a mira práktika ku tabata lia hende na kriminalidat organisá, pa hopi hende a marka un fase nobo pa Boneiru.” Tambe el a ekspresá e shòk, fèrdrit ,miedu i doló serka e famianan di e dos víktimanan.
Djarason atardi OM a splika kuantu Country Garden a pidi di servisionan di rastreamentu. Segun Hambeukers e investigashon grandi i kompliká a tuma un aña, i sentenar di amtenar di rastreamentu tabata envolví. Defensa i Wardakosta tambe a duna asistensia. Durante e investigashon a detené un total di 13 hende komo sospechoso, a interseptá 88 number di telefon pa un periodo kortiku òf mas largu i tabatin 18 listramentu di kas. Tambe outoridatnan a papia ku mas o ménos 200 persona komo testigu i a tene mas ku 100 interogashon di sospechoso.
Senario
Rammeloo a splika korte ku a base di e echonan ku ta konosí, ta un senario so ta posibel. A base di esaki OM ta eksihí 24 aña pa kada un di e dos sospechosonan. “No tin espasio pa un senario alternativo. E dos sospechosonan Cueto Pacheco i Wanga a lòk e víktimanan Scholtz i Lourens na un lugá ketu i a asesiná nan. Nan a planeá e asesinatonan aki delantá. Ta trata di un likidashon konsiente.”
Pasobra no ta konosí eksaktamente kua papel kada un a hunga, nan tur dos mester haña mésun kastigu, Rammeloo a bisa. “E echonan a kousa masha inkietut, sigur den e komunidat chikí di Boneiru. Despues di nan detenshon nan no a koperá na e solushon di e delitu. No a duna komprenshon tokante e loke ku a pasa ku Scholtz i Lourens den e último momentonan di nan bida. Esaki ta insoportabel pa e famianan. Esaki ta hasi e kos èkstra doloroso.”
Daño
OM a pidi korte pa duna e famianan daño material so. E daño imaterial ku a pidi no ta un konsekuensha direkto di echonan ku a prueba, segun OM. E abogadonan di e sospechosonan djaweps ta tene nan anotashon di pleitu. Ainda no ta konosí si esaki lo tuma lugá promé ku liberá e sospechosonan. Wes Irma Lips ta sentensia dia 27 di februari.
Outor Belkis Osepa