E camber hiperbarico, poco despues cu el a wordo traslada pa su sitio di operacion. Na su banda drechi, Rudy Davelaar y na su banda robez dr. Christian Mejia, miembro di e hunta di directiva di e fundacion | Potrèt:Ariën Rasmijn
ORANJESTAD — Despues di dos aña, Aruba ta bay tin su propio camber hiperbarico atrobe. Siman aki miembronan di Aruba Hyperbaric Chamber Foundation a hiba e sistema hiperbarico na su luga di operacion cerca Baby Beach. Aki dos siman e camber hiperbarico lo bay ta operacional pa asina yuda buceadornan cu ta haya nan mes den problema den nos awanan.
Ariën Rasmijn den combersacion cu Rudy Davelaar, presidente di e fundacion
Na augustus 2012 a stop di ofrece servicio aki di decompresion controla pa buceadornan cu ta haya nan mes den problema den laman. Cantidad di buceadornan turista y local cu ta sambuya den awanan rond di Aruba ta aproximadamente mescos. Te awo esnan cu tabata bira malo mester a wordo traslada pa Boneiro pa haya tratamento hiperbarico. Por cierto, 90.000 diver ta bishita Aruba cada aña. Esey ta dos pa tres biaha mas cu Boneiro.
Financiamento propio
Davelaar ta splica cu ya for di 2012 caba a spurba lobby pa trece un sistema hiperbarico bek. A lobby cu ministernan di Salubridad Publico y Turismo y cu Aruba Tourism Authority. Ora a ripara cu gobierno no tabata mustra interes pa trece e machine bek, a dicidi pa haci esaki cu fondonan priva bou un fundacion. Un aparato hiperbarico ta costa mas cu 100.000 florin, pero calculando entre otro transporte, e suma total ta yega na di alrededor di 175.000 florin.
Mas tipo di tratamento
Un hyperbaric chamber no ta yuda sambuyador so. Tin 14 tratamento cu por duna cu e sistema aki. E fundacion kier enfoca mas tanto riba tratamento di malesa di decompresion. Cu tempo tambe lo bay wak si por uza e camber pa yuda cu e tratamento di heridanan di pia serca diabeticonan. dentro di dos siman e camber hiperbarico lo ta operacional.
Autor Ariën Rasmijn