Fiskalnan Hambeukers i Rammeloo. Meimei: abogado Wesselius | potrèt: Bòi Antoin
KRALENDIJK – Wes Irma Lips a rechasá e petishon di Ministerio Públiko BES pa obligá Rayan Frans – e sospechoso mas importante den e kaso di asesinato dòbel Country Garden – di haña un investigashon sikiátriko i sikológiko den un klínika di opservashon sikiátriko.
A wanta e kaso den korte kontra Frans te mas lat den aña. Dia 3 di yüni lo e parse dilanti wes pa e seshon pro forma. Tòg riba e último dia di seshon di Country Garden wes Irma Lips a tuma tres desishon.
Pieter Baan Centrum
Lips a haña ku e petishon di OM pa un opservashon den Pieter Baan Centrum na Utrecht no tabata bon motivá. Anteriormente kaba Frans a indiká ku e no ke koperá. Segun Lips no tin sufisiente informashon ku ta hustifiká un opservashon obligatorio. Tambe a rechasá e petishon di defensa i di Frans mes pa lag’é sali liber tanten ku e ta warda su kaso. Tin sufisiente prueba kontra dje pa keda deten’é, segun Lips. E no a honra e petishon di Frans tampoko pa bai será na Aruba na lugá di na Hulanda.
Emoshonalmente Frans a konta djabièrnè den sala di korte ku e no ta soportá e situashon ku e ta aden mas. Regularmente e famianan di e víktima ta menasá i intimidá su famia na Boneiru, segun Frans. Tambe el a papia di destrukshonnan na outonan. E no ta kome bon tampoko den prizòn na Hulanda. For di su detenshon aña pasá Frans tabata será den un prizòn na Almere. Despues a pas’é pa Roermond. E distansha grandi ta hasi difísil pa su abogado Roy Gonet pa komuniká bon ku Frans. Ta pesei a wanta e kaso.
Remarkabel
E desishonnan di Lips riba e último dia di seshon pa no laga e sospechosonan Winklaar i Janga sali liber ta remarkabel. Dos otro sospechoso Martijn i Alcantara Gil djaweps a tende di wes Lips ku lo duna nan apsolushon konforme e eksihensha di OM. Nan tur dos ta liber awor. OM a pidi apsolushon pa tur kuater sospechoso. Ounke Winklaar i Janga tabata liber kaba nan mester warda nan veredikto te 27 di februari. E dia ei e sospechosonan Gerson Cueto Pacheco i Carlos Wanga tambe lo tende nan veredikto.
Outor Belkis Osepa