Tankinan di warda awa mas importante di WEB na Seru Largu | potrèt Boi Antoin
KRALENDIJK – E kompania di awa i energia na Boneiru – WEB – a laga listra e ret di awa di bebe intensivamente en buska di konsentrashon di bakteria di legionèla. Na dos lugá den e ret a haña konsentrashonnan oumentá di e bakteria di legionèla tipo 1 den e pipanan di awa, asina direktor Alfred Koolman di WEB ta bisa. “Nos a tuma akshon mésora pa pèrkura pa e awa sigui kore bon.”
E bakteria agresivo di legionèla tipo 1 ta dañino pa hende. A haña e dos kasonan nobo di legionèla tipo 1 na Kralendijk i Rincon den midishon na desèmber i yanüari; un konsentrashon di legionèla den ret di pipa di awa i unu serka un edifisio di Rijksgebouwendienst.
Belkis Osepa ta papia ku direktor di WEB Alfredo Kooiman
Warda di polis
Na desèmber WEB a anunsiá presensia di legionèla den awa di bebe den besindario di e warda di polis nobo na Kralendijk. E tempu ei tabata trata di un bakteria di legionèla ménos dañino. A sigui mas midishon, akshon i diferente análisis di eksperto. E tempu ei WEB a bisa ku e situashon no ta alarmante.
Pa motibu di presensia di legionèla rondo di warda di polis, WEB a fókùs riba henter e ret di awa di pipa i a hasi un inventarisashon, Koolman ta bisa. “Nos a inspektá luganan i edifisionan kaminda legionèla por plama. Nos por sigui hasi tur sorto di kos serka esnan ku ta usa awa di bebe. Pero si e kontaminashon ta den nos ret nos mester trata e problema na su orígen.”
Direktor Alfredo Koolman WEB | potrèt Belkis Osepa
No ta alarmante
Koolman ta bisa eksplisitamente ku e konsentrashonnan haltu di legionèla tipo 1 no ta alarmante, ta trata di un nivel abou. “Riba un isla tropikal generalmente bo ta haña legionèla den awa di bebe. Pa medio di midishon bo ta sa ta unda e ta presente. Nos mester tene kuidou si ku e tipo 1. I tuma akshon mésora.
WEB a eksaminá su pipanan di awa i su fábrika di awa na Hato i e tankinan di warda awa na Seru Largu, na Rincon i na Sabadeco. Huntu ku Rijksgebouwendienst tambe a inspektá e pipanan di edifisionan. Direktiva di WEB ta reuní strukturalmente ku tur stakeholder manera Rijksgebouwendienst, warda di polis, servisio di Supervishon i Mantenshon i ekspertonan di Kòrsou i Aruba tokante e investigashonnan di legionèla. Pronto WEB lo presentá un raportahe tokante e konklushonnan na Kuerpo Públiko i representantenan di Ministerio di Infrastruktura i Medio Ambiente na Boneiru.
Partinan suak
Segun Koolman no por haña un bista total di un dia pa otro di e partinan suak den e ret di pipa di awa, kaminda e bakteria di legionèla ta keda. E midishon aki ta un proseso kontinuo. Na Boneiru tin mas o ménos ocho mil bibienda. Ta tuma tempu pa tuma tur e akshonnan nesesario den e sistema di awa, segun Koolman. Kaminda ku a konstatá legionèla den awa pará ketu, WEB entre otro a kita e partinan sin salida di e ret di pipa di awa. Na e edifisio kaminda a haña e bakteria tambe a pèrkurá pa awa keda kore bon.
Kooiman ta enfatisá ku por bebe e awa di bebe di Boneiru normalmente. Legionèla tipo 1 ta dañino solamente den forma di neblina ora por ehèmpel usa un ducha. Por ta dañino pa salu si inhalá aerosolnan (gota di awa masha chiki) ku ta kontaminá ku e bakteria.
Outor Belkis Osepa