Plaza Hotel ketu bai buskando un kumpradó | Potrét José Manuel Dias
WILLEMSTAD – Banko di Seguro Sosial (SVB) i Ontvanger di Kòrsou, komo e kreditornan di mas grandi di Plaza Hotèl a bai di akuerdo pa yuda den e proseso pa buska un kumpradó pa e hotèl. “Ta e intenshon pa forma un grupo ku ke bai pusha benta di e hotèl”, asina gerente finansiero di Plaza Hotèl, Erik Ogenia a konfirmá.
Ku yudansa di e kreditornan aki gerensia di Plaza Hotèl ta spera di por haña un kumpradó riba término kòrtiku ku lo por kontinuá ku operashon di e hotèl i asina solushoná e problema di e debenan atrasá na e.o. SVB, Ontvanger i Aqualectra.
Un reportahe di José Manuel Dias
Segun Ogenia den prinsipio tabatin sigur sinku grupo di invershonista ku a mustra interés pero na final ta ku dos grupo so gerensia a sinta na mesa kuné. Ta trata aki di un grupo di Spaña i un otro for di Venezuela pero te awe no a yega na nada konkreto ku niun di dos. Kenneth Valpoort di e sindikato HORECAF a bisa ku ta pa motibu ku e doñonan ta pidiendo demasiado sèn i no ta suministrando sifranan di kuantu lo bai kosta pa renobá e hotèl.
A kanselá findishi
Dia 26 di yanüari último tabatin planiá un findishi kaminda lo mester a bende propiedatnan di Plaza Hotèl komo konsekuensia di e beslagnan ku SVB i Ontvanger a laga pone riba e hotèl. Sinembargo riba petishon di e hotèl e kreditornan a kanselá e findishi pendiente di un solushon a korto plaso.
Di akuerdo ku Ogenia Plaza Hotèl debe SVB i Ontvanger alrededor di shete mion florin. Tambe e hotèl tin un debe atrasá na Aqualectra ku ta suma 200 mil florin. Pa evitá ku ta kòrta koriente e hotèl mester paga tur dia un suma di 10 mil florin kèsh na Aqualectra. Esaki ta resultado di un areglo di pago ku a yega na dje despues ku dia 12 di mart 2014 Aqualectra a kita koriente pa falta di kumplimentu ku pago.
Bankarota
Mirando e impakto ku un posibel bankarota di e hotèl lo tin riba kuponan di trabou, tantu SVB komo Ontvanger a disidí di duna gerensia di Plaza Hotèl mas tempu pa por yega na un kumpradó. Aktualmente Plaza Hotèl huntu ku e Kasino tin alrededor di 80 trahadó den servisio.
Direktor di SVB Phillip Martis i hefe di Ontvanger Alfonso Trona di Ontvanger a konfirmá ku nan a keda aserká pa forma parti di un grupo ku lo mester yuda buska kumpradó pa e hotèl pero a aklará ku pa lei nan no por hasi esaki. Loke si e instansianan aki a akordá ku Plaza Hotèl ta ku por lo pronto no ta bai ehersé e derechi riba beslag i ta duna gerensia algun luna di tempu pa yega na un kumpradó.
Pa loke ta e situashon finansiero aktual di Plaza Hotèl, Ogenia a bisa ku e preshon di likides ta hopi grandi i ku ta sumamente difisil pa paga salarionan na tempu i alabes kumpli ku e areglo di pago di Aqualectra. E situashon di e hotèl empeorá na momentu ku e aerolinea DAE a sera su portanan na ougùstus di 2013 lagando un debe atras di 800 mil florin.
Outor José Manuel Dias