Fòndu di Caracasbaai ta severamente sushá ku PAH | potrèt: Leoni Leidel-Schenk
WILLEMSTAD – Fòndu di dos di e kuater bahianan na Kòrsou ku a examiná ta severamente sushá ku hidrógeno polisíkliko aromátiko of hydrocarbon (PAH). Asina a sali for di un estudio di e laboratorio MOTE Marine na Merka.
Sushamentu ku PAH ta sosodé ora kimamentu di produkto di zeta i gas ta inkompletu. Estudionan internashonal ta mustra ku PAH ta kousa daño na DNA i ta kousa kanser i enfermedat di pulmon.
Espesialmente banda di instalashonnan petrokímiko mundialmente ta trata di presensia oumentá di hydrocarbon den tera, awa i airu.
E konsentrashonnan mas haltu na Kòrsou a haña den Schottegat i Caracasbaai. E investigashon ta mustra ku e balornan ku a haña ta pa mas parti petrogéniko. Segun e investigadónan esaki ta mustra riba refineria komo fuente di e sushamentu.
E instituto di marina na Estádos Unídos a tuma muestra di airu tambe di PAH i investigá nan. E konsentrashonnan di mas haltu a haña den dos bario ku ta keda direktamente bou di huma di Isla: Habaai i Marchena. Ei tambe ta kla pa e investigadónan ku e sushamentu no ta bini di tráfiko riba kaminda sino di e kimamentu inkompletu di zeta krudo i produktonan di gas riba e tereno di Isla.
Outor Dick Drayer