Proyekto Wechi ku hopi kontroversia | potrét: José Manuel Dias
WILLEMSTAD – Despues di 25 aña ketu bai tin kontroversia riba e destinashon di Plantage Weitje (Wechi). Gobièrnu di Kòrsou a logra duna Wechi e destinashon di bibienda, pero organisashonnan ambiental ta keda para ariba ku no por konstruí nada riba Wechi pa motibu ku no a kana e prosedura konforme e ‘Eilandelijk Ruimtelijk Ontwikkelingsplan Curaçao’ (EROC).
Segun Lloyd Narain di Amigu di Tera i Defensa Ambiental gobièrnu ta usando un veredikto di Korte pa hasi komo si fuera ku e tin karta habrí pa konstruí pero hurídikamente esaki no ta klòp.
José Manuel Dias den kòmbersashon ku èks-diputado Anthony Godett
Te ainda no a otorgá pèrmit di konstrukshon pasobra promé ku duna pèrmit mester kumpli ku e prosedura abase di kual ta trata e 140 opheshonnan di e organisashonnan ambiental. Te ainda ningun di e opheshonnan a keda tratá.
Lista largu di kontratempu
E kontroversia rondó di Wechi ta data for di 1990 ora ku Pedro ‘papito’ van der Dijs a lanta Wechi Real Estate NV ku e propósito pa kumpra e tereno aki for di famia Beaujon pa únikamente 1,8 mion florin.
Wechi no tabatin destinashon di bibienda ora ku Wechi Real Estate NV a kumpra e tereno. Dia 7 di mei 1992 a bini un ‘landsbesluit’ den kual gobièrnu di Antia Hulandes a otorgá Wechi Real Estate NV eksonerashon di impuesto (tax holiday) pa desaroyá 80 hèktar di tereno na Wechi. Fundashon Kas Popular (FKP) a atkirí e derechi aki na momentu ku FKP a kumpra Wechi for di Wechi Real Estate NV pa e suma di seis mion florin.
Segun un dokumentu di e sekshon di asuntunan di tereno di DROV fechá 31 di òktober 1994, na momentu ku FKP a kumpra Wechi serka Wechi Real Estate NV ,dia 12 di mart 1993, e direktor di FKP tabata na mes momentu direktor di e kompania aki. E tempu ei èks-diputado Anthony Godett a denunsiá e echonan aki serka Ministerio Públiko pero su petishon pa laga hasi un investigashon no a keda honrá.
Aprobashon di EOP
Na 1995 Konseho Insular di Kòrsou a aprobá e ‘Eilandelijk Ontwikkelingsplan (EOP) sin tene kuenta ku e ‘tax holiday’ eksistente i a duna Wechi e destinashon di ‘open land’. Esaki ta nifiká ku ta mantené e tereno den e estado ku e ta, pues no por konstruí nada riba dje. Mirando esaki FKP a apelá e desishon i dia 6 di mart 1997 pa medio di un ‘landsbesluit’ gobernadó di e tempu ei, Jaime Saleh, a disidi ku Konseho Insular mester tuma un desishon di nobo.
Dia 11 di sèptèmber 1999 Konseho Insular di Kòrsou a aprobá kreashon di kuater área den EOP denominá komo ‘witte vlek’. Un ‘witte vlek’ por keda desaroyá basta ku duna un pèrmit. Wechi tabata un di e kuater áreanan aki. E tempu ei a disidi ku di e 134 hèktar di tereno ku Wechi ta konsisti di dje ta denominá 80 hèktar komo área di bibienda.
Na 2012 FKP a hasi un petishon di permit pa konstrui un kompleho di apartamentu na Wechi konsistiendo di ocho unidat. Segun minister di Planifikashon Urbano, Earl Balborda, e pèrmit aki a keda konsipiá pero nunka a keda otorgá. Dia 7 di ougùstus 2014 FKP a hasi petishon pa konstruí e promé 70 kasnan pero te ainda no a haña pèrmit.
Aktualmente gobièrnu ta hasiendo e trabounan di preparashon di tereno, sin ku tin un pèrmit di konstrukson. FKP ke konstrui 762 kas di kual un parti lo ta bibienda sosial i e otro parti lo konsisti di bibienda komersial, pero no ke kuminsá konstruí sin pèrmit. E reglanan di EROC no a keda kumplí. E organisashonnan ambiental ta menasá ku mas kaso den Korte. E preshon pa otorgá un ‘pèrmit na drechi’ ta awor serka minister Balborda.
Outor José Manuel Dias
Lesa mas: Balborda ta kuminsá desaroyá Wechi sin plan di parselashon