Proyekto piloto ‘Community Mailbox’ di CPost | potrét: José Manuel Dias
WILLEMSTAD – Di e kantidat di 1250 ‘Community Mailbox’ (C-Box) ku tin riba e tereno di Pòstkantor na Groot Kwartier, mas di 300 (25 porshentu) no ta den uso pa motibu ku e doñonan no a bai buska nan yabi. Asina Jervhes Josephia di CPost International, antes Pòstkantor, a konfirmá.
“Debidamente nos a notifiká tur doño di adrès pa pasa tuma nan yabi di C-Box”, Josephia a enfatisá. Sinembargo te ku aworaki ta únikamente 75 porshentu a bai tuma nan yabi i ta hasiendo uso di e sistema di C-Box. Esaki ta nifiká ku ne momentu aki tin mas di 300 adrès ku no ta risibiendo pòst pa motibu ku no a bai tuma yabi.
Un reportahe di José Manuel Dias
Ta trata aki di un proyekto piloto di CPost International, kaminda for di promé di yanüari último a stòp di entregá pòst den e barionan di Groot Kwartier, Emmastad i Biesheuvel. Tur korespondensia pa habitantenan di e barionan aki ta keda depositá den e ‘C-Box’ korespondiente ku ta situá riba e tereno di Pòstkantor na Groot Kwartier.
Na novèmber di aña pasá a informá e habitantenan ku na momentu ku drenta korespondensia kada habitante lo keda notifiká via di un ‘e-mail’. Sinembargo te awe e sistema di notifikashon via di ‘e-mail’ no ta funshonando. Lider di e proyekto piloto C-Box, Jervhes Josephia, a garantisá ku promé ku fin di e luna aki e sistema aki lo ta operashonal.
Baha gastu
Ku introdukshon di e proyekto‘Community Mailbox’, CPost International ta spera di por baha gradualmente su gastunan di operashon sin ku esaki nesesariamente mester nifiká retiru di personal. E partidónan di karta ku bini liber lo bai hasi otro tipo di trabou manera por ehèmpel repartí paketenan. N’e momentu aki CPost International ta pasando den un situashon finansiero basta difisil debi na un bahada drástiko den e volumen di kartanan.
Mas bario
Despues di e proyekto piloto di Groot Kwartier ta e intenshon pa den luna di mart kuminsáinstalá dos sistema mas di ‘Community Mailbox’ ku lo kubri e barionan di Kas Grandi , Marchena, Suffisant i Souax. Den su promé fase e proyekto lo kosta mei mion florin i lo konsistí di tres lokalidat sentral kaminda lo instalá e C-Boxnan.
Outor José Manuel Dias