Foto: Ariën Rasmijn
ORANJESTAD — Minister di Energia Mike de Meza ta bisa cu no tin un acuerdo ainda entre Valero y gobierno di Aruba pa loke ta un datum pa cuminsa desmantela e refineria. Sinembargo ta kere cu ya pa mitar di aña aki lo entrega tereno di e refineria bek pa pais Aruba.
Ariën Rasmijn den combersacion cu minister De Meza
E mandatario ta bisa cu e status actual di e refineria ta cu Valero ta haciendo nan ‘due diligence’ pa loke ta e posibilidad di entrega tereno bek pa gobierno. Segun De Meza esaki ta encera tambe limpieza di e tereno, locual lo ta stipula den e terminonan di e contracto firma na 1989 cu Coastal cu Valero a tuma over. Anteriormente e mandatario a declara cu net e parti ey lo tabata un punto di negociacion ainda entre gobierno y e compania petrolero. Na momento aki e compania di consuiltancy Hulandes Arcadis ta yurdando Valero pa cumpli cu su parti.
“Gobierno di Aruba no tin nada di haber cu esaki”, asina De Meza ta duna di conoce. E aña aki e periodo di tres aña ta termina den cual e refineria no ta wordo opera. Segun e contracto esaki ta encera cu automaticamente lo cuminsa duna e tereno di e refineri bek na pais Aruba. Segun minister De Meza esaki lo por tuma luga caba na mitar di aña. E idea di gobierno pa cu e tereno cu ta hopi grandi y ta encera waf di e refineria ta pa lanta industrianan chikto, pero entre otro tambe posiblemente un waf di crucero. De Meza ta bisa cu den proximo periodo lo bay presenta e plannan pa e tereno.
Drempel halto
Mientras tanto ainda ta tene e porta habri te na ultimo momento pa un posibel cumprado. Durante conferencia di prensa ayera mainta e mandatario no kier a duna nomber of detaye di companianan cu lo ta interesa, bisando cu culakier compania cu ta bati na porta di gobierno di Aruba automaticamente ta wordo referi na e oficina di Valero na San Antonio, Texas. Bisando esaki, e mandatario ta ripiti loke prome minister Eman ya caba a declara diferente biaha respondiendo riba speculacionnan di un posibel compra di e refineria. Durante e conferencia di prensa De Meza a declara sinembargo cu e chens cu berdad lo yega na un compra ta birando mas y mas chikito. Hecho ta tambe cu e drempel mester keda halto. Si un compania tume e refineria over, e mester ta uno cu e capital y e know-how pa renoba e refineria y opere na un manera adecua.
Segun De Meza Valero mes ta preocupa pa cu esaki ya cu no kier bende na ‘ken cu ta’ anto un aña despues tin un caso den corte contra nan paso ta parti di nan ‘due dilligence’ pa sa cu e compania cu ta cumpra ta uno cu e capacidad pa opera e facilidad.
Autor Ariën Rasmijn