Mal komunikashon i lès demotivante motibu di komportashon malu na SGB

18 February 2015

Studiantenan kla pa bai kas despues di skol | foto Belkis Osepa

KRALENDIJK – Studiantenan di e skol sekundario Scholengemeenschap Bonaire (SGB) ta di opinion ku mester pone bon atenshon na e malkomunikashon entre nan i dosentenenan na e skol. Tambe mester analisá e manera kon ta duna lès. “No mester wak nos komportashon só, pero tambe di e dosentenan.” Asina algun studiante a bisa ora a puntra nan opinion riba un aserkamentu mas severo i situashon na SGB. E manera tiki motivante i tiki inspirativo ku ta duna lès ta influensha e komunikashon na SGB. 

Algun siman pasá direktor interino Lydia Emerencia a anunsiá ku lo introdusí medidanan di sero tolerensha kontra di mal komportashon di alumnonan. Emerencia a papia asta di komportashon tirániko. Tin kuestion di bringamentu, pleitu ku palabra malu, menasa i intimidashon seksual. E aserkamentu mas severo ta parti di un plan di seguridat integral den kua SGB lo atendé di manera preventivo i mantenshon di órden kontra agresividat i mal komportashon di studiantenan.

Un reportahe di Belkis Osepa

Malkomportashon
Algun studiante di nan banda ta haña ku e esfera na skol a drecha hopi kompará ku aña pasá. Tambe e relashon entre studiantenan ta bon. E malkomportashon ta mas bien den direkshon di dosentenan. Nan mes ta rekonosé na  mal komportashon, pero ta haña ku dosentenan tambe ta malkomportá nan mes.

Karni putrí
“Awe un dosente a yama un mucha ‘karni putrí’, un studiante ta bisa. “I si nos zundra bèk, ta manda nos e lider di tim.” E diferente alunonan ku a puntra nan opinion ta papia di aserkamentu ménos pedagógiko, lèsnan ku no ta motivante i tiki variashon den lès. “Nan ta ni tende nos.”

For di e rekashonnan di e alumnonan por konkluí ku ta reina un falta di komunikashon entre studiantenan i dosente. Aparte di e lèsnan ku ta kai afó pa motibu ku dosentenan fiho ta sigui estudio, tin studiantenan ku ta spèibel pasobra nan no ta motivá. Un solushon di un studiante a zona fásil: “Kuminsá duna lèsnan dushi, nos komportashon lo drecha. No tin mester di aserkamente mas severo. Si no ta asina, lo mi sigui spèibel.”

Outor Belkis Osepa